Тошкентда метро поездлари оралиқ вақти қисқартирилиб, автобуслар сони оширилади

Янги ўқув йили бошланиши билан Тошкент метросида поездлар оралиқ вақти қисқартирилади. Бу ҳақда метрополитен маъмурияти ЎзАга маълум қилган.

4 сентябрдан ўқув машғулотлари бошланиши сабаб шаҳар жамоат транспортига бўлган талаб ошади. Мазкур талабни қондириш ва метродан фойдаланишда йўловчиларга янада қулайлик яратиш мақсадида поездлар вақт оралиқлари қисқартирилиши режалаштирилган.

Хусусан, тиғиз вақтларда Чилонзор йўналишида 1,5 дақиқалик, Ўзбекистон йўналишида эса 3-3,5 дақиқалик ҳамда Юнусобод йўналишида эса, 5 дақиқалик интервалда поездлар ҳаракати йўлга қўйилади.

Шунингдек, Тошкент шаҳридаги йўловчилар ташиш узлуксизлигини таъминлаш ва кўрсатилаётган хизматлар сифатини янада ошириш мақсадида, бугунги кунда ишга чиқарилаётган 1464 та автобуслар сонини 1550 тагача ва бажариладиган қатновлар сонини 21,7 мингтадан 22,8 мингтага ошириш режалаштирилган.

Бундан ташқари, сентябрь ойи давомида қўшимча яна 9 та янги автобус йўналишларини ташкил қилиш режалаштирилган.