Tadbirkor Nigora Murotova “Daryo” muxbiri bilan suhbatda koronavirus ilk bor O‘zbekistonga kirib kelgan paytda boshidan o‘tgan sinovlarni qanday qilib yengganini esladi.
Tadbirkor Nigora Murotova 20-avgust —Tadbirkorlar kuni munosabati bilan “Shuhrat” medali bilan taqdirlandi. Bu natijaga erishguncha u ko‘plab sinovlardan o‘tganini aytadi. Xususan, 2020-yilning 15-mart kuni Nigora Murotovada respublikada ilk bor koronavirus qayd etilgandi. Mazkur hodisa aholida biroz vahima uyg‘otgan, hattoki koronavirus O‘zbekistonda tarqalishiga Nigora Murotovani sababchi qilib ko‘rsatishga uringanlar ham bo‘lgan. Tadbirkor o‘sha davrdagi intervyularidan birida ijtimoiy tarmoqlardagi haqoratlar dilini og‘ritganini aytgandi.
“Meni nafaqat koronavirus kasalligi, balki shunday maʼnaviyati past odamlarning haqoratlari juda qiynadi, soatlab uzluksiz yig‘lashga majbur qildi. Axir men kasallikni ataylab olib kelmaganman-ku, birinchi navbatda oilamga, jigarlarimga o‘zim yuqtirmayman-ku! Pandemiya bu, aybdor qidirishning o‘zi mantiqsizlik”, —deya fikr bildirgan u.
Tadbirkor “Daryo” muxbiri bilan suhbatda shunday og‘ir vaziyatdan qanday chiqqani, pandemiyaning o‘z faoliyatiga taʼsiri haqida gapirdi.
“Inson hayotda ko‘p sinovlarga duch keladi. Qiyinchiliklarni boshdan o‘tkazadi. Bu sinovlar, albatta, unga tayyor bo‘lgan, u sinovlardan o‘ta oladigan insonlarga berilarkan. Bu haqda eslashni ham, gapirishni ham xohlamayman. Lekin bir gapni aytmoqchiman, qalbimizda borini ‘kommentariy’da ko‘rsatamiz, qalbimizda borini insonlarga tarqatamiz. Qalbimizda samimiyat, oqko‘ngillik bo‘lsa, biz atrofimizdagilarga shu energiyani beramiz. Qalbimizda kirlik, manmansirash va kibr bo‘lsa, kimdir yiqilgan davrda uni tepkilaymiz, ustidan kulamiz. Internetda tanqidiy yozilgan fikrlar yonida, dalda beradigan gaplar aytgan tanish va notanish insonlarning ko‘pligi menga kuch berdi”, — dedi tadbirkor.
Nigora Murotova koronavirusdan davolangach, oradan 52 kun o‘tib ish faoliyatini boshlaganini esladi.
“U paytda bizning davlatga yordamimiz kerak edi. Koronavirus o‘sha yili yozda avjiga chiqqandi. Biz hech qanaqa gina-kudurat qilmasdan, o‘zimizda kuch topib fuqarolarimizga juda ham ko‘p yordam berdik. O‘sha paytda bemorlarni koridorlargacha yotqizishga majbur bo‘lganmiz. Yotoqlarimiz shu darajada to‘lib ketgandi. Chunki bizdan Sog‘liqni saqlash vazirligi iltimos qilgandi. Davlat kasalxonalari bu ‘nagruzka’ni ko‘tara olmayotgandi, shuning uchun xususiy sektorga ham bemorlarni davolash imkoniyati berilgan. Mana, pandemiya ham o‘tdi. Shu fursatdan foydalanib jamoamiz shifokorlariga rahmat aytaman. Ularning sinovli kunlarda qo‘llaganini qadrlayman”, —dedi tadbirkor.
Ma’lumot uchun, 2023-yil mayda Jahon sog‘liqni saqlash tashkiloti rahbari Tedros Gebreyesus dunyoda Covid-19 pandemiyasi tugagani haqida xabar bergan.
“2020-yildan buyon rasman 7 millionga yaqin kishi Covid-19 oqibatida hayotdan ko‘z yumdi. Ammo real raqamlar bundan ancha yuqori. Biz kamida 20 million o‘lim holatini nazarda tutyapmiz”, — degan Gebreyesus.
Eslatib o‘tamiz, JSST tomonidan 2020-yil 30-yanvarda koronavirus infeksiyasi tarqalishi munosabati bilan dastlab favqulodda holat, o‘sha yil 11-mart sanasida esa pandemiya eʼlon qilingan.
Izoh (0)