Ўзбекистонда 65 нафар бола ўлимига сабаб экани айтилаётган “Док-1 Макс” сиропи бўйича бўлиб ўтаётган суд мажлисларида ҳиндистонлик тадбиркор ўзига тегишли корхонага инспекцион текширув тушишининг олдини олиш, шунингдек, бунинг наздида Ўзбекистон ҳудудига “Док-1 Макс” сиропи каби яна бир талабга жавоб бермайдиган дорига рухсат олишга урингани маълум бўлганди. Навбатдаги суд мажлисида сўз олган агентликнинг собиқ ходими 33 минг доллар воқеасига қўшимча киритди.
2022 йилнинг июль ойи ўрталари ёки охирларидами ҳамкасбим, раҳбарнинг биринчи ўринбосари А.А.нинг хизмат хонасига иш билан кирдим. Ҳамкасбим ўша пайтдаги раҳбар С.К.дан бир қанча топшириқлар келиб тушганини, топшириқлар орасида иккита фирмани “инспекциядан ечиш” бўйича топшириқ ҳам бўлганини айтиб, шу топшириқ бўйича иш юритилиши кераклигини қўшимча қилди.
Мен раҳбардан шундай топшириқ тушдими, деб ҳайратланганимда А.А. раҳбардан келган топшириқни Telegram’да қабул қилиб олганини айтиб, ёзишмаларини менга кўрсатди. Топшириқда иккита фирманинг номи ёзилган экан. Шундан сўнг А.А. экспертлар кенгаши котиби У.Т.ни чақириб, раҳбар топшириғини айтди. Шунда у бу топшириқни шахсан раҳбар бердими, мен бунга аниқлик киритишим керак деб хонадан чиқиб кетди, — дейди собиқ раҳбарини айблаган судланувчи Н.М.
Судланувчининг айтишича, дастлабки тергов ҳаракатлари давомида У.Т. вазиятга аниқлик киритиш учун Фармацевтика тармоғини ривожлантириш агентлиги собиқ раҳбари қабулида бўлиб, иккита фирмага нисбатан тайинланган текширувни бекор қилиш ҳақида қатъий топшириқ берилганига ишонч ҳосил қилган.
Судда мазкур айбловни рад этган Фармацевтика тармоғини ривожлантириш агентлигининг собиқ раҳбари С.К. фирмаларга тайинланган инспекцион текширувни рад этганини билдириб, бу ҳақдаги ҳужжатга билмасдан имзо қўйиб юборган бўлиши мумкинлигини айтди.
Менга кунига 15-20 талаб ҳужжат олиб кирилиб, имзо қўйиларди. Бу ҳужжат ҳам ҳужжатлар орасига тушиб қолган ва билмасдан имзо қўйиб юборган бўлишим мумкин, — дейди С.К.
Аввалроқ суд мажлисларининг бирида ҳиндистонлик тадбиркор корхонасига келиши айтилган инспекцион текширувни тўхтатиш яна бир яроқсиз дорига рухсат олиш учун 33 минг доллар пора берганини тан олганди.
Қайд этилишича, Marion Biotech Pvt. Ltd. корхонасида инспекцион текширув ўтказиш белгиланганидан хабар топган корхонанинг норасмий раҳбари бошқа бир ҳиндистонлик Ж.С. Quramax Medical МЧЖ директори Р.С.П. ва жамиятнинг савдо директори Б.Қ.лар билан тил бириктириб, корхонанинг ишлаб чиқариш шароитлари белгиланган талабларга жавоб бермаслиги, текширув ўтказилган тақдирда мазкур камчиликлар юзага чиқиб, корхонанинг бошқа дори воситаларининг ҳам Ўзбекистонда рўйхатдан ўтказиш тақиқланиши ҳамда уларнинг импорти тўхтатилиши мумкинлигини тахмин қилган. Ва давлат маркази масъуллари орасидан инспекцион текширувни бекор қилиш имкони бўлган ходимни топиш ҳаракатига тушган. Бу ишда уларга Ж.Э. исмли масъул ёрдам бериб, эвазига 45 минг доллар сўрагани, аммо 33 минг доллар олгани аниқ бўлганди. Ҳиндистонлик айбланувчи Р.С.П. текширувни тўхтатиш учун 33 минг доллар берилганини тан олиб, пул масъулларга берилганини, аммо нима мақсадда берилганидан бехабарлигини қўшимча қилди.
Изоҳ (0)