Ўзбекистонда давлат бошқарувида сифат ва самарадорликни янада ошириш масаласида БАА билан ҳамкорлик кенгайтирилади. Бу ҳақда Президент ҳузуридаги Давлат хизматини ривожлантириш агентлиги хабар берди.
Маълумки, Президент ҳузуридаги Стратегик ислоҳотлар ва Давлат хизматини ривожлантириш агентликлари Бирлашган Араб Амирликлари бош вазири офиси билан ҳамкорликда “Government Quality Award — Ўзбекистон Республикаси давлат органлари самарадорлиги мукофоти” дастурини амалга оширмоқда.
Дастур — мамлакатда давлат бошқаруви ва давлат хизмати самарадорлигини баҳолашга йўналтирилган лойиҳа ҳисобланади. Жорий йилда энг яхши кўрсаткичларни қайд қилган давлат ташкилотлари ва давлат хизматчилари бир неча номинация бўйича мукофотланиши назарда тутилган.
23 август куни ташкил этилган учрашувда Government Quality Award дастури доирасида амалга оширилган ишларнинг натижалари муҳокама қилинди.
Ушбу дастурда 17 та вазирлик иштирок этаётган бўлиб, Президент ҳузуридаги Давлат бошқаруви академиясида ташкил этилган интервью босқичида номзодларни жами 10 та категория бўйича баҳолаш ишлари якунланди.
Тадбирда Давлат хизматини ривожлантириш агентлиги директорининг биринчи ўринбосари Отабек Хасанов ҳам иштирок этиб, БАА билан давлат бошқаруви тизимида ҳамкорликни янада кенгайтириш мақсадли эканлигини таъкидлади.
Томонлар келажакда Ўзбекистонда ассессорларни тайёрлаб бориш, давлат бошқарувида сифат ва самарадорликни таъминлашга қаратилган илғор ёндашувларни жорий қилиш юзасидан келишиб олди.
Изоҳ (0)