Шавкат Мирзиёев Самарқандга ташрифини Имом Бухорий мақбарасини зиёрат қилишдан бошлади

Шавкат Мирзиёев 24 август куни Самарқанд вилоятига келди, деб хабар беради Президент матбуот хизмати. 

Давлат раҳбари аввало Пайариқ туманига бориб, Имом Бухорий мақбарасини зиёрат қилди. Қуръон тиловат этилиб, дуо ўқилди.

“Илоҳим, дуоларимиз ижобат бўлиб, Аллоҳ юртимизни тинчлик-осойишталикда сақласин, файз-у барака берсин. Мана, мустақиллигимизнинг 32 йиллик байрами арафасида турибмиз. Халқимиз билан бирга шу кунларга етганимизга шукрлар айтамиз. Олдимизга яна катта-катта режалар қўйганмиз. Бунинг учун икки карра кўпроқ ҳаракат қилишимиз, ёшлар тарбиясига эътибор беришимиз керак. Ҳамма соҳада таълимни, билимни оширсак, натижалар юқори бўлади. Ёшларимиз Имом Бухорий, Мирзо Улуғбекдай боболаримизга муносиб бўлишини истаймиз”, — деди Шавкат Мирзиёев.

Қайд этилишича, Ислом маърифати бўйича, худди Бухородагидек, Самарқандда ҳам намуна яратиш кераклиги таъкидланди. Алломалар меросидан фойдаланиб, жаҳолатга қарши маърифатни кучайтириш, ёшларни ёт ғоялар таъсиридан асраш бўйича кўрсатмалар берилди.

Ҳозирги кунда Имом Бухорий мажмуаси янгидан барпо этилмоқда. Давлат раҳбари пардозлаш ишлари намуналарини кўздан кечирди.

Шавкат Мирзиёев 2022 йил август ойида амалий ташриф билан Самарқанд вилоятига борганида Имом Бухорий мақбараси ёнида электрон музей ташкил этиш таклифини билдирганди.