Россия президенти Владимир Путин Тверь вилоятида юз берган авиаҳалокатда “Вагнер” раҳбари Евгений Пригожин ўлганини тасдиқлади. Бу ҳақда “РБК” хабар берди.
Ўзини ўзи мустақил деб эълон қилган Донецк халқ республикаси (ДХР) раҳбари Денис Пушилин билан учрашувда Путин Пригожин “тақдири мураккаб, аммо истеъдодли одам” бўлганини айтди.
Ҳақиқатан ҳам, бирламчи маълумотлар ‘Вагнер’ кампаниясининг ходимлари самолётда бўлганини кўрсатса, шуни таъкидлашни истардимки, улар ‘Украинада неонацистлар режимига’ қарши кураш бўйича умумий ишимизга катта ҳисса қўшган. Биз буни эслаймиз, биламиз ва унутмаймиз.
Мен Пригожинни жуда узоқ вақтдан бери: 1990 йилларнинг бошидан бери танийман. У тақдири мураккаб, ҳаётда жиддий хатоларга йўл қўйган одам эди. Керакли натижаларга эришди. У иқтидорли инсон, иқтидорли тадбиркор эди. Нафақат мамлакатимизда балки чет элда, хусусан, Африкада ҳам фаол ишлади. У ерда нефть, газ, қимматбаҳо металлар ва тошлар билан шуғулланган, — деди Россия президенти.
Шунингдек, у авиаҳалокат бўйича тергов тўлиқ ҳажмда олиб борилиши ва якунланишини айтди. Путин авиаҳалокатда ҳалок бўлган инсонларнинг оила аъзоларига ҳамдардлик билдирди.
Пригожин самолёти ҳалокати ҳақида нима маълум?
23 август куни Россиянинг Тверь вилоятида “Вагнер” раҳбарига тегишли самолёт ҳалокатга учради, унинг бортида 10 киши бўлган. “Росавиация” самолёт йўловчилари рўйхатида Пригожин ва унинг ўринбосари Дмитрий Уткин борлигини маълум қилди. Расмий равишда, “Вагнер” раҳбарининг ўлими ҳали тасдиқланмаган.
Россия давлат оммавий ахборот воситалари қутқарувчилар самолётдаги барча 10 йўловчининг жасадини топгани ҳақида хабар берган. Шу билан бирга, самолёт ҳаво ҳужумидан мудофаа тизими томонидан йўқ қилингани, портлатилгани ҳақида версиялар бор.
“Росавиация”нинг махсус тузилган комиссияси самолётнинг қулаш ҳолати ва сабабларини ўрганишга киришган. Мутахассислар “қора қутилар”даги ёзувларни топиб, ўрганиб чиқиши керак бўлади.
Изоҳ (0)