Путин Қодировнинг онасини орден билан мукофотлади (видео)

Россия президенти Владимир Путин Чеченистон раҳбари Рамзан Қодировнинг онасини “Шон-шараф” ордени билан мукофотлади. Бу ҳақда “ТACС” хабар берди.

Аймани Қодирова Ахмат Қодиров номидаги вилоят жамоат фонди раҳбари ҳисобланади. Чеченистон раҳбарининг онаси “фаол ижтимоий фаолияти” сабаб мукофотлангани айтилган. Қодирова Украинанинг Россия томонидан босиб олинган ҳудудлари аҳолиси ва жангариларга гуманитар ёрдам жўнатиб турувчи жамғармани бошқаради.

Чеченистон раҳбарининг онаси аллақачон ўнта мукофотга, жумладан, тан олинмаган Донецк ва Луганск халқ республикаларининг “Дўстлик” орденига эга.

“Жамғарманинг инсонпарварлик миссиясига берилган юксак баҳо учун умуммиллий етакчимиздан (Путиндан) чексиз миннатдорман”, – дея Рамзан Қодиров мукофотга муносабат билдирди.

Рамзан Қодировнинг қариндошлари қандай мукофотлар олган?

Рамзан Қодировнинг қариндошлари, худди ўзи каби, мунтазам равишда минтақавий ва федерал мукофот ва унвонлар олади. 

• 2022 йил ноябрда Путин Чеченистон раҳбарининг рафиқаси Медни Қодировага “Қаҳрамон она” унвонини берган. 
• 2023 йил февралда Қодировнинг ўзи биринчи “Чеченистон Қаҳрамони” бўлди (бу унвонни унинг ўзи таъсис этган) ва март ойида у “Чеченистонда хизмат кўрсатган инсон ҳуқуқлари ҳимоячиси” медалини олди.
• Июнь ойида Чеченистон раҳбарининг 20 ёшли қизи Хутмат “тиббиёт ривожига қўшган улкан ҳиссаси” учун республиканинг олий ордени билан тақдирланган эди.
• Путин Чеченистон раҳбарининг 26 ёшли жияни Ҳамзат Қодиров “Ватан олдидаги хизматлари учун” II даражали ордени билан тақдирлаганди.  У“фаолиятидаги муваффақиятлар ва кўп йиллик виждонли меҳнати учун” мукофотланган.

BBC рус хизматининг 2018 йилда ҳисоб-китобларига кўра, Чеченистондаги 158 нафар юқори мартабали амалдорнинг 30 фоизи республика раҳбарининг қариндошлари, 23 фоизи қишлоқдошлари, яна 12 фоизи Чеченистон раҳбарининг дўстлари ва уларнинг қариндошларидир. 

“Қариндошларимнинг ҳар қандай муассаса ва ҳар қандай лавозимдаги талаби ўн баробар кўп, чунки улар менга қарамай ишлашларини исботлаши керак. Кимга ишонсам, ўшани тайинлайман”, — деган эди Қодиров бу борада.