Баъзи касалликларни бутунлай даволашнинг имкони бўлмаса-да, улар билан ҳам нормал ҳаёт кечириш мумкин. Қандли диабет касаллиги ҳам шулар жумласидандир. Касаллик аниқлангандан кейин ҳам ўзини хотиржам тутган юлдузлар бу борада ортиқча ташвишланмайди. Улар иложи борича парҳез, спорт ва вақтида дам олишга амал қилади.
Том Хенкс
“Оскар” мукофоти соҳиби 2013 йилда қандли диабет ҳақида сўз очган эди. Маълум бўлишича, актёр 1992 йилдан буён касаллик билан курашиб келган ва кейинчалик у касалликнинг иккинчи турига ўтган. Бунга асосий сабаблардан бири — доимий суратга тушиш ишлари учун парҳез тутиш ҳамда вазндаги кучли ўзгаришлардир.
“Мен безовта қилаётган белгиларга эътиборсиз бўлган, натижада касаллик ташхисини олган дангаса америкаликларнинг авлодиданман… Бу аҳмоқликнинг ўзгинаси”, − дейди актёр.
У касаллик билан яшашга кўникди ва ҳозирда ўзини жуда яхши ҳис қилмоқда.
Хелли Берри
Актриса 19 ёшидаёқ қанд касали ҳақида билиб, дарҳол парҳез қилишни бошлаган ва ҳозиргача бунга амал қилади. Аввалига у тез орада вафот этишини тан олган эди. Аммо буни тақдирнинг бир совғаси ҳамда соғлом турмуш тарзини олиб боришга ишора сифатида қабул қилди.
Шерон Стоун
Актриса қандли диабетнинг биринчи тоифаси билан касалланган. У мунтазам равишда инсулин дозасини қабул қилади. Актриса гўзал кўринишнинг сири нимада, деган саволга: “Ҳеч қандай сир йўқ. Мен керак бўлган барча ишни қиламан: тўғри овқатланиш, ухлаш ва спорт билан шуғулланиш. Мен жуда ҳам бахтлиман”, — дея жавоб берган.
Жорж Лукас
“Юлдузлар жанги” режиссёри Вьетнамда хизматни ўташ учун тиббий кўрикдан ўтаётганда қанд касалининг иккинчи турида эканини билган. Эҳтимол, касаллик отаси ёки бобосидан ўтгандир.
Ник Жонас
Ҳинд актрисаси Приянка Чопранинг турмуш ўртоғи 13 йилдан буён қанд касали билан яшаб келмоқда. “Ушбу касаллик мени тамом қилиши мумкин эди, шукрки, бундай бўлмади. Одатдагидек ҳаёт кечираман, мунтазам равишда қондаги қанд миқдорини ўлчайман ва инсулин қабул қиламан”, − дейди Жонас.
Юлия Савичева
Россиялик қўшиқчи ҳомиладорлик вақтида қандли диабетга чалинган. Бундай ҳолат тез вазн ортиши туфайли тахминан 5 фоиз аёлларда учрайди. Туғруқдан кейин касаллик ҳам бартараф этилиши мумкин, аммо парҳезни давом эттириш керак бўлади.
Изоҳ (0)