“Фавқулодда вазият рўй бериш хавфи ёки фавқулодда вазият рўй берганлиги ҳақида хабар беришнинг автоматлаштирилган тизимини ривожлантириш ҳамда ундан самарали фойдаланишни ташкил этиш тўғрисида”ги Вазирлар Маҳкамаси қарори қабул қилинди.
Ҳужжат билан тегишли низом тасдиқланмоқда, унга кўра:
- хабар бериш тизимининг асосий мақсади — бу аҳоли ва тегишли органларга фавқулодда вазиятлар ҳақида ҳаққоний ва тезкор маълумотлар етказиш;
- хабар бериш тизими республика, ҳудудий, локал ва объект даражасида амалга оширилади ва ФВВ вазири, фуқаро муҳофазаси бошлиғи ва объектлар раҳбарларининг буйруғи асосида ишга туширилади;
- Фавқулодда вазиятда (ёки рўй беришидан олдин) “Барчага диққат” сигнали ва электросиреналар рупорли овоз кучайтиргич орқали 3 дақиқагача аҳолига эшиттирилади.
- сигналдан сўнг юзага келган фавқулодда вазият ҳақида маълумот телевидение, радио ва интернет орқали давомийлиги 5 дақиқагача бўлган видео ва аудиоролик кўринишда етказилади;
- шунингдек аҳоли мобил операторлар орқали ҳам хабардор қилинади.
Қуйидагилар хабар бериш тизимини яратиш буюртмачиси этиб белгиланди:
- республика ва маҳаллий даражада — Фавқулодда вазиятлар вазирлиги;
- локал даражада — бўйсунувида фавқулодда вазият таъсири объект ҳудудидан ташқарига чиқадиган потенсиал хавфли объект мавжуд бўлган ташкилотлар;
- объект даражасида — таъсири объект ҳудудидан ташқарига чиқмайдиган фавқулодда вазият рўй бериши мумкин бўлган потенсиал хавфли объектлар ҳамда бир вақтнинг ўзида ходимлар ва ташриф буюрувчиларнинг сони 50 нафар ва ундан кўп бўлган ташкилотлар.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари фавқулодда вазият рўй бергани ҳақида алоҳида ўз вақтида хабар беришни ва ахборот узатишни таъминлайди. Аҳолини хабардор қилиш ва аҳолига ахборот узатишнинг махсус техник воситаларини ўрнатиш учун жойлар, шунингдек ОАВда эфир вақти ажратилишида ФВВга кўмаклашади.
Изоҳ (0)