Оилавий ва ДХШ асосидаги боғчалар: давлат улар учун қандай имтиёзлар бермоқда?

Ўзбекистонда 2022 йилда жами 1 811 та мактабгача таълим ташкилотлари (МТТ) фаолияти йўлга қўйилди. Шундан 169 та давлат хусусий шерикчилиги (ДХШ) асосидаги нодавлат боғчалар ҳамда 1 346 та оилавий шаклдаги нодавлат МТТлар ташкил этилди. Натижада, 118 557 та қўшимча қувват ҳамда 10 116 та янги иш ўринлари яратилди.

“Дарё” мухбири Тошкент шаҳридаги боғчалардан бирида бўлиб, соҳа мутахассислари билан суҳбатлашди. Мактабгача таълим агентлиги бўлим бошлиғи Абдуғулом Ҳакимовнинг айтишича, ҳозирда оилавий МТТлар очиш учун тадбиркорларга кенг имкониятлар яратилган.

“2018 йилда оилавий МТТлари бўйича фақатгина 750 та лойиҳа амалга оширилган бўлса, ҳозирга келиб уларнинг сони 21 мингтадан ортди. Бу ўз ўрнида бюрократик тўсиқларнинг камлиги, тадбиркорлар яратилган шароитлар кафолатлангани, энг асосийси ушбу йўналишдаги лойиҳаларни амалга оширишда ҳеч қандай чекловлар қўйилмагани айнан оилавий МТТлар ривожланишига олиб келди.

Энг фойдали тарафи, тадбиркор ушбу фаолият турини бошлаганда болаларга сарфланадиган озиқ-овқат маблағи давлат томонидан 100 фоиз қоплаб берилади. Бундан ташқари, оилавий МТТ тарбиячиси ва унинг ёрдамчисига давлат томонидан давлат боғчаларида белгиланган ойлик-маоши уларга субсидия шаклида тўлаб берилади”, — деди мутахассис.

2018 йилдан 2023 йил июнгача бўлган даврда давлат томонидан мазкур йўналишдаги тадбиркорларни қўллаб-қувватлаш учун 3,5 триллион сўм субсидия ажратилган.

Сўнгги йилларда ДХШ асосида очилаётган боғчалар сони ҳам сезиларли даражада кўпаймоқда. Мутахассисларнинг таъкидлашларича, бунга ҳукумат томонидан берилаётган имтиёзлар яхшигина туртки бўлмоқда.

Самарқандлик тадбиркор Барно Туданованинг айтишича, ДХШ асосида ташкил этилган боғчаларда тарбияланаётган болалар учун озиқ-овқат маҳсулотларига давлат томонидан субсидиялар берилади.

“Шу билан бирга, электр энергия электр энергия, газ таъминотлари учун ҳам давлат субсидия ажратмоқда. Бу ҳам тадбиркорга енгиллик беради. Бугунги кунгача 3 та ДХШ асосидаги МТТлар барпо этдим. У боғчаларда жами 150 нафар аёллар иш билан таъминланди, 375 нафар болалар тарбия олмоқда. Болажонларимиз бир неча йўналишларда халқаро мусобақаларда чемпион бўлмоқда”, — деди Барно Туданова.

Маълум қилинишича, 2017 йилда давлат МТТлари сони 5 000 тадан ортиқ бўлган. Нодавлат боғчалар улуши эса фақатгина 1 фоизни ташкил қилган. Ҳозир эса нодавлат МТТлар улуши умумий ҳисобда 40 фоизга етган.

“Беш йилда бу қадар юқори ўсишга эришиш мазкур соҳада олиб борилган самарасидан дарак беради. ДХШ соҳасини ривожлантириш учун шу пайтгача давлат томонидан 2,5 триллион сўм маблағ йўналтирилди. Тадбиркорларга имтиёзли кредитлар, ерлар берилди. Қолаверса, электр ва газ харажатларининг 50 фоизи давлат томонидан қопланмоқда. Қишда боғчаларни иситиш учун кўмир харажатларини ҳам давлат қоплаб беради”, — дейди Абдуғулом Ҳакимов.

2023 йилнинг 1 август ҳолатига кўра, республикада жами 30 792 та мактабгача таълим ташкилотлари (МТТ) фаолият кўрсатяпти. Шундан давлатга қарашли боғчалар сони 6 734 та, нодавлат боғчалар 24 058 тани ташкил этади.