Энергетика вазирлиги ҳузуридаги “Ўзэнергоинспекция” томонидан Бош прокуратура, “Ўзтрансгаз” АЖ ва “Ҳудудгазтаъминот” АЖ ходимлари билан ҳамкорликда Қорақалпоғистон Республикасида ўтказилган назорат тадбирларида Нукус туманида жойлашган “Мах Газ Сервис” МЧЖ табиий газдан ноқонуний фойдаланиб келаётгани аниқланди. Бу ҳақда Энергетика вазирлиги матбуот хизмати хабар берди.
Қайд этилишича, “Мах Газ Сервис” МЧЖга қарашли автомобилларга газ тўлдириш компрессор шохобчасида ўрнатилган газ сарфини ўлчаш комплексига ташқи таъсир кўрсатилгани маълум бўлган.
Мазкур ноқонуний ҳолат натижасида давлат манфаатларига етказилган зарар миқдори 3 миллиард 854 миллион 433 минг сўм (3 миллион 854 минг 433 метр куб)ни ташкил этган.
Маълумот учун, ушбу ҳажмдаги табиий газ 19 мингдан зиёд хонадоннинг бир ойлик истеъмолини ташкил қилади.
Аниқланган ҳолат юзасидан расмийлаштирилган ҳужжатлар белгиланган тартибда ҳуқуқни муҳофаза этувчи органларга тақдим қилинган.
Жиззах, Андижон ва Фарғона вилоятларида электрдан ноқонуний фойдаланганлар 913,5 миллион сўм зарар етказгани тўғрисида хабар берилганди. Шунингдек, Ўзбекистоннинг уч вилоятида газ ва “свет”дан ноқонуний фойдаланганлар қарийб 352 млн сўм зарар етказганди. “Ўзэнергоинспекция” эса бешта метан заправкадан 11 миллиард сўмлик табиий газ ўғирланганини аниқлаган эди.
Изоҳ (0)