Тошкент вилояти ҳокими Зоир Мирзаев Қибрай тумани ҳокими ўринбосарлари, ҳокимликнинг бошқа барча мутахассислари вазифасидан озод қилди. Бу ҳақда вилоят ҳокимлиги матбуот хизмати хабар берди.
Қайд этилишича, 17 август куни бўлиб ўтган Қибрай тумани кенгашининг навбатдан ташқари сессиясида Зоир Мирзаев Қибрай тумани ҳокимининг ўринбосарлари, ҳокимликнинг бошқа барча мутахассислари бошлаб вазифасидан озод қилиниши, уларнинг фаолиятига ҳуқуқий баҳо берилиб, “тоза” чиқса, кейин ишини давом эттиришини маълум қилган.
Шунингдек, Қибрай туманидаги ҳуқуқ-тартибот идораларидан ташқари барча давлат ташкилотларининг раҳбарлари ҳам лавозимидан озод қилинди. Уларнинг фаолиятига ҳам бир ҳафта ичида баҳо берилади.
“Кадрлар билан ишлашнинг “Қибрай тажрибаси” жорий қилинади. Бўшаган ўринларга, туман ташкилотларига танлов асосида ёппасига ёшлар ишга олинади. Қибрайга шу тариқа “янги қон” қуйилмаса бўлмайди”, — деган Зоир Мирзаев.
Сессияда вилоят ҳокими туманда қарийб 20 минг фуқаро мигрант сифатида хорижда бўлиб турганини айтиб, буни “Қибрай учун ярашмайдиган ҳолат” деб айтган. Туманда олти ой якуни бўйича саноат маҳсулотлари, ўтган йилга солиштирганда, ишлаб чиқариш ҳажми ўзгармагани, 8 та корхона ўз фаолиятини тўхтатганини қайд этган.
Аҳоли сонига нисбатан 84 та сартарошхона, гўзаллик салонлари сингари хизмат кўрсатиш соҳаси объектлари тақчил. KPI тизими бўйича туман маҳаллаларидаги ҳоким ёрдамчилари умумий 76 балл олган, бу кўрсаткич вилоятда 13-ўрин ҳисобланади;
“Салоҳиятли тадбиркорлар Қибрайда ошкоралик, адолат бўлишига ишонмайди. Экспортёр корхоналар фаолиятини қўллаб-қувватлаш йўқ. Натижада кейинги икки йилда туманда ишлаётган 7 та экспортёр корхона бошқа туманларга ҳисоб рақамини кўчириб олиб кетган. Демак, улар бу ердаги мутасаддилар билан ишлашни хоҳламаган”, — деган Зоир Мирзаев.
Ҳоким Қибрайда қурилиш ва қишлоқ хўжалиги соҳасида жуда кўп қонунбузарлик, бошбошдоқлик борлигини айтиб, буни тартибга солиш вақти келганини таъкидлаган.
“Бугун Қибрайда 4 минг нафар бола учун боғчада жой йўқ. Мактабгача таълимга қамров 67 фоиз, холос. Бу Қибрай учун шармандали ҳолат эмасми? Тумандаги 16 та маҳаллада биттаям боғча йўқ. Масалан, “Қурилиш”, “Май”, “Ўнқўрғон”, “Уймовут” сингари маҳаллаларда болалар учун боғча умуман йўқ!”, — деб танқид қилган вилоят ҳокими.
Қайд этилишича, вилоятда энг кўп умумий овқатланиш шохобчалари Қибрайда. Бироқ уларнинг аксарияти расман ишга олинмаган, нолегал ишлайди. Мана шундай ҳолатлар бандлик дастурларининг ижросига монелик қилади. Зоир Мирзаев шу маънода жамоатчилик, туман депутатлари масалага эътибор қаратиши зарурлигини, Қибрай туманида яширин иқтисодиётга қарши кескин курашиш кераклиги, шу мақсадда туман ҳокими раислигида махсус ишчи гуруҳ тузиш кераклигини айтган.
Бундан ташқари, туманда мурожаатлар билан ишлаш ҳолати ҳам аянчли экани кўрсатиб ўтилган: 1697 та мурожаат келиб тушган бўлса, шундан атиги 8 фоизи ижобий ҳал этилган, холос.
“28 та қабул, 128 та фуқаро. Яъни битта қабулда ўртача 4 та фуқаро қатнашган. Ҳоким қабул ўтказса, 4 нафар фуқаро келибди. Ким ишонади бунга? Кўзбўямачиликку бу?!”, — деган Зоир Мирзаев.
Йиғилишда Зоир Мирзаев Қибрай тумани ҳокими лавозимига Музаффар Рашидов номзодини тавсия қилган.
Изоҳ (1)
kimnidir ishdan olish juda ham oson,bu yechim bo'la olmaydi undan ko'ra mavjud muammolarni hal qilish bo'yicha topshiriqlar ijrosini ta'minlash zarur, mehnat qonunchiligida ham yoppasiga ishdan olinsin degan modda kiritilmagan yurtimizda qonun ustuvor bo'lishini xoxlayman Zoir Mirzayev isgdan olish tartibida bir marta ogohlantirish va ikki marta xayfsan keyin ishdan olinish masalasi ko'riladi