Ўзбекистондаги халқаро аэропортларнинг учиб кетиш йўналишида “яшил” ва “қизил” йўлакли тизим бекор қилиниб, масофавий божхона назорати жорий этилди. Учиб келиш қисмида эса “яшил” ва “қизил” йўлаклар сақланиб қолади. Бу ҳақда бугун 17 август куни Божхона қўмитаси томонидан Тошкент халқаро аэропортида ташкил қилинган пресс-турда айтиб ўтилди, дея хабар берди “Дарё” мухбири.
Тушунтирилишича, халқаро аэропортларда йўловчилар оқими йилдан йилга ошиб бораётгани божхона назорати тартибларини соддалаштиришни тақозо этмоқда. Янги тизим орқали йўловчиларга бир қатор афзалликлар яратиляпти.
Масалан, назорат зоналарида ортиқча вақт сарфи камаяди. Чунки жисмоний шахслар ва уларнинг қўл юклари визуал кузатув орқали назоратдан ўтказилади.
“Дарё” мухбири билан суҳбатда “Тошкент-Аэро” ихтисослашган божхона комплекси бўлим бошлиғи Акмал Эшонов янги тизимнинг афзалликлари ҳақида гапирди.
“Масофавий божхона назорати тизимида учиб кетиш йўналишида ҳаракатланадиган йўловчиларни визуал кузатуви амалга оширилади. Бунда махсус ажратилган жой орқали хавфни бошқариш усули қўлланилади ва танлаб олиш принципига асосланиб йўловчилар божхона назорати расмийлаштирувидан ўтказилади”, — деди мутахассис.
Суҳбат давомида Акмал Эшонов янги тизимнинг аввалгиларидан фарқларини тушунтирди.
“Қизил” ва “яшил” йўлаклар жорий қилингунига қадар учиб кетиш йўналишидаги залларда қатор рентген ускуналари бўлган. Ҳар бир йўловчи божхона назоратидан ўтказилган. Божхона декларацияси тўлдириларди. Бу эса йўловчиларнинг ортиқча вақтини олар, ходимларимизга ҳам иш юкламасини оширарди. 2018 йилдан “қизил” ва “яшил” йўлаклар жорий қилинди. Бунда йўловчилар икки йўлакка тақсимланади. “Яшил” йўлакдаги йўловчи божхона декларацияси тўлдирмайди ва қандай товарлар олиб ўтаётганини оғзаки айтади. “Қизил” йўлакдаги йўловчи ўзида бўлган товарларни, валюта ва заргарлик буюмларини декларацияда кўрсатади ва уни божхона органига тақдим этиш орқали ҳаракатланади.
Ҳозирга келиб 2022 йилдаги президент фармони асосида халқаро аэропортларда Масофавий божхона назорати тизими жорий этилди. Бу тизимга ҳозирча учиб кетиш йўналишларидаги залларимиз мослаштирилди. “Қизил” ва “яшил” йўлакларимиз ўзининг актуаллигини йўқотди ва уларни мазкур заллардан олиб ташладик. Кўраётган бўлсанглар, залда бирорта божхона ходими йўловчиларга кўринмайди. Қачонки йўловчида махсус декларацияланадиган товарлар бўлса, у махсус ажратилган жойларга йўналтирилади ҳамда ўша ерда юклари рўйхатга олинади. Декларация қилинадиган товарлари бўлмаган йўловчиларга божхона ходими умуман юзланмайди. Уларни вақтини олмайди. Яъни жараён анча қулайлашган”, — деди у.
Шунингдек, халқаро аэропортлар залларида замонавий технологияларга асосланган хавфни бошқариш тизими ҳам йўлга қўйилди. Йўловчи терминалга кириши билан унинг юз қисмини Face-ID орқали сканер қилинади.
“Танлаб олиш принципи деганда, тизимни ўзи йўловчини танлаб беради. Яъни тизим автоматик равишда қайси йўловчини божхона назорати жойига ўтказиш керак, қайси бирига нисбатан назорат қўлланмаслиги лозимлигини аниқлайди. Қолаверса, шахсларнинг паспортлари ҳам интеграция қилинган. Тизим йўловчига нисбатан хавф даражасини белгилаб беради”, — деди Акмал Эшонов
Қўшимча қилинишича, ҳозирда халқаро аэропортларга учиб келишда “яшил” ва “қизиқ” йўлаклар сақлаб қолинган. Бу ҳолат кириб келишга нисбатан учиб кетишда йўловчиларга қонунчиликда товар, валюта бойликлари текширувини соддалаштириш белгилангани билан изоҳланди.
Изоҳ (0)