АҚШнинг Гавайи штатини ташкил этувчи Гавайи оролларидаги ўрмон ёнғинларида ҳалок бўлганлар сони 106 нафарга етди. Бу ҳақда губернатор Жош Грин CNN телеканалига маълум қилди.
Қурбонлардан фақат беш кишининг шахси аниқланган. 15 август куни Грин 99 кишининг ўлими ҳақида маълум қилганди.
Яқин кунларда қурбонлар сони ортиши мумкин — қутқарувчилар қидирувни давом эттирмоқда. Ҳозирча ёнғинлардан зарар кўрган ҳудуднинг атиги 32 фоизи текшириб бўлинган.
Гавайида ўрмон ёнғинлари 8 август куни бошланди. Табиий офатдан, айниқса, Мауи туристик ороли жиддий зарар кўрди. Оролдан 14 минг киши эвакуация қилинди.
Гавайидаги ўрмон ёнғинлари АҚШда сўнгги 100 йилдаги энг ҳалокатли ёнғинга айланди. Баъзи версияларга кўра, оролдаги ёнғин кучли қурғоқчилик ва бўронли шамоллар туфайли юзага келган. Мауида баъзи жойларда шамол тезлиги соатига 67 мил (тахминан 108 км/соат) га етгани хабар қилинган, бу эса ёнғиннинг тез тарқалишига туртки бўлган.
Изоҳ (0)