Мактабгача ва мактаб таълими вазирлиги томонидан халқаро алоқаларни кенгайтириш ва инвестицияларни жалб қилиш бўйича қатор лойиҳалар амалга оширилмоқда.
Хусусан, Хитой ҳукумати билан ҳамкорликда Ўзбекистон мактабларини компьютер ўқув ускуналари билан жиҳозлаш лойиҳаси якунланди.
Вазирлик бошқарма бошлиғи Санжар Турсунов “Дарё” нашрига берган интервьюсида мазкур лойиҳа тўғрисида маълумот берди.
Хитой билан ҳамкорликда амалга оширилган “5-9-синфларда чет тили ва информатика фанларини ўқитиш сифатини ошириш” лойиҳасининг умумий қиймати 12 миллион долларини ташкил этди. Ўзлаштирилган инвестиция маблағлари ҳисобидан 1 303 та умумтаълим мактаби компьютер ўқув ускуналари билан жиҳозланди. Мазкур лойиҳа доирасида 20 848 та компьютер, 1 303 та проектор, электрон доска ва принтерлар Ўзбекистонга олиб келинди. Айни пайтда ушбу ўқув ускуналарини республикамиздаги умумтаълим мактабларига ўрнатиш ишлари давом этмоқда, — деди вазирлик вакили.
Шу билан бирга, вазирлик Корея Эксимбанки билан ҳамкорликда 2 та йирик лойиҳани амалга оширмоқда.
Биринчиси, “Умумтаълим мактабларини компьютер ўқув жиҳозлари билан жиҳозлаш” лойиҳаси бўлиб, унинг умумий қиймати 33 миллион долларни ташкил этади. Мазкур лойиҳа доирасида Ўзбекистондаги 3 810 та мактаб компьютер ўқув жиҳозлари билан тўлиқ жиҳозланди. Корея Эксимбанки билан ҳамкорликда амалга оширилган яна бири йирик лойиҳа, “Умумтаълим мактабларидаги физика, кимё, биология ва информатика кабинетларини замонавий ўқув-лаборатория жиҳозлари билан жиҳозлаш, ахборот-коммуникация технологияларини ривожлантириш” инвестиция лойиҳаси ҳисобланади. Унинг умумий қиймати — қиймати 140 миллион долларга тенг, — деди мутахассис.
Вазирлик вакилининг билдиришича, мактаб тизимини ривожлантириш учун бу каби халқаро ҳамкорликдаги лойиҳаларни кўпайтириш, таълимга янада катта инвестицияларни жалб қилиш ишлари давом эттирилмоқда. Яқин орқада яна бир қанча янги лойиҳалар тўғрисида маълумот берилади.
Маълумотларга кўра, айни пайтда Ҳиндистоннинг Тошкентдаги элчихонаси билан ҳамкорликда Сирдарё вилоятидаги умумтаълим мактабларини компьютер ўқув жиҳозлари билан жиҳозлаш грант лойиҳасини амалга ошириш режалаштирилган”, — дейди Санжар Турсунов.
Маълум қилинишича, лойиҳа доирасида 1 миллион доллар грант маблағлари ажратилади. Ҳозирда лойиҳанинг тендер ҳужжатлари ишлаб чиқилган.
Изоҳ (0)