Ижтимоий тармоқларда Тошкент шаҳрида аёл 50 км тезликда ҳаракатланганда ҳам 72 км тезлик билан жарима келаётганини айтиб, мурожаат билан чиқди. Йўл ҳаракати хавфсизлиги хизмати мазкур хабарлар юзасидан тушунтириш бериб, синов ўтказди.
Хабарга кўра, президентнинг тегишли фармони ҳамда Вазирлар Маҳкамасининг қарорига асосан 2023 йил 1 апрелдан бошлаб Тошкент шаҳри ҳудудида машиналарнинг юқори чекланган тезлиги соатига 60 километр этиб белгиланган. Бу бўйича йўл ҳаракати қоидаларининг 78-бандига ҳам тегишли ўзгартиришлар киритилган.
Ходимлар томонидан суриштирув олиб борилиб, мурожаат йўллаган фуқаро аниқланди ва қоидабузарлик содир этилган жой — Янгиҳаёт туманининг ўзида ҳолатга тўлиқ ойдинлик киритилди. Камеранинг ишлаш тартиби ва аниқлигини текшириш бўйича синов ташкил этилди. Синовдан сўнг аёл адашганини тушуниб етди.
“Балки, ўзим адашгандирман. Чунки Тошкент шаҳри дейилган жойда 60 бўлиши керак экан, мен 60 дан паст келдим деб ўйлаган эканман. Балки, ўзим тезликни ошириб юборгандирман. Мен адашган эканман”, — дейди аёл.
Изоҳ (0)