Вазирлар Маҳкамасининг 25 мартдаги қарори билан Йўл-патрул хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиш тартиби тўғрисидаги низомга ўзгартириш ва қўшимчалар киритилди.
Хусусан, ўзгартириш ва қўшимчалар қуйидагиларни назарда тутади:
- транспорт воситалари ҳайдовчиларининг гиёҳвандлик воситалари ёки психотроп моддалар истеъмол қилганлиги ҳолатини аниқлашда наркотестер махсус мосламасидан фойдаланиш;
- наркотестер махсус мосламаси ёрдамида транспорт воситалари ҳайдовчиларининг гиёҳвандлик воситалари ёки психотроп моддалар истеъмол қилганлиги аниқланган ҳолларда йўл-патрул хизмати ходимлари томонидан амалга оширилиши лозим бўлган ҳаракатлар алгоритми.
Транспорт воситалари ҳайдовчиларининг гиёҳвандлик воситалари ёки психотроп моддалар истеъмол қилганлигини аниқлаш қоидабузарлик юз берган жойнинг ўзида амалга оширилиши мумкин.
Ҳайдовчи наркотестер ёрдамида текширувдан ўтишдан бош тортган ёхуд унда текширув натижаларига эътироз мавжуд бўлган ҳолларда, шунингдек, наркотестер ёрдамида текширилганда унинг гиёҳвандлик воситалари ёки психотроп моддалар истеъмол қилганлиги аниқланган тақдирда, ЙПХ ходими транспорт воситаси ҳайдовчисини алкоголли ичимликлар, гиёҳвандлик воситалари ёки психотроп моддалар таъсиридан маст ҳолда эканлигини аниқлаш мақсадида тиббий текширувдан ўтказиш учун туман (шаҳар) даволаш-профилактика муассасасига олиб боради.
Ҳужжат қонун ҳужжатлари маълумотлари миллий базасида эълон қилинган, 28 майдан кучга киради.
Эслатиб ўтамиз, 2021 йил декабрдан Ўзбекистонда ҳайдовчини суратга олиш имкони бўлган янги алкотестерлардан фойдаланиш бошлангани тўғрисида хабар берилганди. Ўшанда 150 дона янги намунадаги алкотестер республика бўйлаб ЙПХ ходимларига тарқатилган эди. ЙПХ ходими ҳайдовчини алкогол ичимликдан маст деб гумонлаган вақтда Алcостоп 8000С алкотестер мосламаси ёрдамида ҳайдовчи тўхтатилган жойнинг ўзида текширувларни амалга оширади.
Изоҳ (0)