Техас штатида яшовчи Пегги Жонс бир вақтнинг ўзида ҳам қирғий, ҳам илон ҳужумига учраб, жароҳат олди. 64 ёшли аёл ўз ҳовлисида майса ўраётганида устига илон келиб тушган, деб хабар бермоқда BBC.
Қайд этилишича, воқеа 25 июль куни Техаснинг Луизиана билан чегараси яқинида жойлашган Силсби шаҳрида содир бўлган.
Илонни аёлнинг уйи устидан учиб ўтаётган қирғий ташлаб юборган ва шу заҳоти ўлжасини яна олиб кетиш учун пастга шўнғиган.
Илон эса аёлнинг қўлига ўралиб қолган ва унинг юзига ҳужум қила бошлаган, бу вақтда қирғий унинг баданига тирноқларини ботирган.
“Мен илонни улоқтирмоқчи бўлдим, лекин у қўлимга ўралиб олганди. Илон юзимга ҳамла қилди, кўзойнагимга бир-икки марта урилди”, — деди Жонс журналистларга.
Қирғий илонни Пегги Жонснинг қўлидан дарҳол ажратиб ололмагач, тирноқларини бир неча бор аёлнинг қўлига ботирган.
Кураш қирғийнинг ғалабаси билан якунланган ва у ўз ўлжасини олиб учиб кетган, шундан кейин Пегги Жонснинг ҳайратдан қотиб қолган турмуш ўртоғи рафиқасини шифохонага олиб кетган.
Аёлнинг териси тешилган, кесилган, тирналган ва қаттиқ кўкарган. Бундан ташқари, ҳужум пайтида илон унинг кўзойнагини синдириб юборган.
Аёл CBS News учун интервьюсида Техасда ёввойи жониворлар билан содир бўладиган ҳодисалар камёб эмаслигини айтди.
“Аввал ҳам қирғий илонни аввал ерга ташлаб, кейин кўтариб олганини кўрганман. Улар бу орқали ўлжасини ўлдирмоқчи бўлади”, — дейди Жонс.
Изоҳ (0)