ИИВ блогерлар Санжар Икромов ва Шерали Комиловни қидирувга берди

Ўзбекистон Ички ишлар вазирлиги блогерлар Санжар Икромов ва Шерали Комиловни қидирувга берди. Бу ҳақда вазирликка таяниб “Газета.уз” хабар берди.

Хабар берилишича, уларнинг исм-шарифлари Ички ишлар вазирлиги сайтининг тегишли бўлимида эълон қилинган. Санжар Хўжа тахаллуси билан танилган Санжар Икромов сиёсат, иқтисод ва психология мавзуларида ёзади ва гапиради. Ҳозирда Туркияда яшайди. У 1988 йилда туғилган, YouTube’да 200 мингдан ортиқ, Telegram’да 18,3 минг, Facebook’да 29 минг обуначиси бор.

Унга нисбатан Жиноят кодексининг 168-моддаси 3-қисми “а” банди (жуда кўп миқдордаги фирибгарлик) бўйича айблов эълон қилинган.

Иккинчи қидирувдаги блогер Шерали Комилов “Детектив Уз” YouTube канали муаллифи, 17,8 минг обуначи, Facebook’да — 8140 кузатувчига эга. У асосан ижтимоий мавзуларни кўтариб чиқади. Унинг кўплаб постларида диний блогер Аброр Абдуазимов (Аброр Мухтор Алий) танқид қилинади. Блогер 1979 йил туғилган.

Унга нисбатан Жиноят кодексининг 168-модда 3-қисми “б” банди (фирибгарлик) ҳамда 140-моддаси 3-қисмининг “а” банди (ҳақорат қилиш жабрланувчини ўз хизмат ёки фуқаролик бурчини бажариши муносабати билан боғлиқ ҳолда) бўйича айблов эълон қилинган.