Жаҳон соғлиқни сақлаш ташкилоти (ЖССТ) коронавирус омикрон штаммининг янги EG.5 “Эрис” варианти дунё бўйлаб тез тарқалаётганини маълум қилди. Шу билан бирга, ЖССТ коронавируснинг янги варианти “глобал миқёсда” аҳоли учун катта хавф туғдирмайди, деб ҳисоблайди.
EG.5 штамми биринчи марта 17 февралда қайд этилган. Ўшандан бери унга чалиниш бўйича “дунё бўйлаб хабар қилинган ҳолатлар улуши барқарор ўсиб бормоқда”, деб тушунтирилди ташкилот пресс-релизида.
“2023 йил 19 июлда бу вирус кузатув остидаги вариант сифатида белгиланди”, — дейди ЖССТ.
Ташкилот вируснинг хавфлилик даражасини баҳолашда давом этяпти.
ЖССТ маълумотларига кўра, EG.5 фаол тарқалишига қарамай, унинг “глобал даражада” аҳоли учун хавф туғдириш даражаси паст.
“Эрис” штаммининг белгилари йўтал, бурун оқиши, иситма, томоқ оғриғи ва кўкрак қафасининг сиқилиши билан намоён бўлади.
Май бошида ЖССТ раҳбари Тедрос Гебрейесус дунёда COVID-19 пандемияси тугагани эълон қилганди. Шу билан бирга, Гебрейесус вируснинг эҳтимолий хавфи давом этишидан огоҳлантирган.
Изоҳ (0)