Qirg‘izistonda 2027-yil 1-yanvardan polimer plyonkali paketlar va plastmassa buyumlar ishlab chiqarish, sotish va bepul tarqatish taqiqlanadi. Respublika prezidenti Sadir Japarov tegishli qonunni imzoladi, deb xabar bermoqda davlat rahbari matbuot xizmati.
Qabul qilingan hujjat polimer materiallarning Qirg‘iziston aholisi salomatligi va atrof-muhitga zararli ta’sirini kamaytirishga qaratilgan. Shuningdek, polietilen paketlar va plastik buyumlarni olib kirish ham taqiqlanmoqda.
Shu bilan birga, Qirg‘izistonning alohida muhofaza etiladigan tabiiy va biosfera hududlarida 2024-yil 1-yanvardan boshlab polimer plyonkadan tayyorlangan plastik buyumlar va paketlar ishlab chiqarishga ham taqiq joriy etildi. Eksport uchun ishlab chiqarilgan paketlar, biologik parchalanadigan polimer materiallardan tayyorlangan, tutqichlari bo‘lmagan va maishiy ehtiyojlar uchun sotiladigan paketlar bundan mustasno.
Savdosi taqiqlangan plastik mahsulotlar ro‘yxatiga quyidagilar kiritilgan:
- bir martalik plastik idishlarning barcha turlari;
- bir martalik plastik oziq-ovqat qadoqlari;
- plastik shisha;
- plastik kapsulalar;
- oziq-ovqat uchun plastik sumkalar.
Qonun rasmiy e’lon qilingan kundan boshlab 15 kun o‘tgach kuchga kiradi.
2022-yil yozida Hindistonda 19 ta toifadagi bir martalik plastik buyumlar, shu jumladan, stakanlar va naychalardan foydalanish taqiqlangan edi.
2021-yildan Yevropada bir martalik plastik idishlardan foydalanish qat’iyan taqiqlangan. 2019-yilda qabul qilingan tegishli qonunga ko‘ra, Yevropa Ittifoqi davlatlari bunday mahsulotlarni bozordan olib tashlashi hamda 2021-yil 3-iyulga qadar ularni ishlab chiqarishni to‘xtatishi kerak edi. 12 oy ichida mavjud zaxiralarni sotishga ruxsat berildi, ammo shundan keyin taqiq to‘liq kuchga kirdi.
Izoh (0)