Президент “Яшил макон” лойиҳаси бўйича ишларни ўз ҳолига ташлаб қўйган раҳбарларни танқид қилди.
Шавкат Мирзиёев 11 август куни Бухорода ўтказилган видеоселектор йиғилишида президент “Яшил макон” умуммиллий лойиҳаси бўйича ишларни ўз ҳолига ташлаб қўйган айрим раҳбарларни танқид қилди.
“Яшил макон” умуммиллий лойиҳаси доирасида барча ҳудудларда кўкаламзорлаштириш даражасини 30 фоизга етказиш бўйича катта дастур қабул қилинган. Бунинг учун ҳар бир вилоят баҳор ва куз мавсумида 15 миллион туп дарахт кўчатлари экиши, барча шаҳарлар атрофида “яшил белбоғ”лар ташкил қилиш зарур.
Лекин айрим раҳбарлар бу ишларни ўз ҳолига ташлаб қўйган. Хусусан, кўчатлар суғориш тизими йўқ ҳудудларга экилгани сабаб 10 миллион ниҳол нобуд бўлган. Дарахт кўчатларини йўллар бўйида экиш ишлари 33 та туман ва шаҳарда умуман бажарилмаган.
Давлат раҳбари ўз ҳудудида экологик вазиятни яхшилаш, аҳолига қулай яшаш ва тоза ҳаво муҳитини яратиш эндиликда ҳокимларнинг энг асосий вазифаларидан бири бўлишини таъкидлади.
Барча тизим ва ҳудуд раҳбарларига маҳаллалар, аҳоли пунктлари, кўп қаватли бино, ҳовлиларни ободонлаштириш ва кўкаламзорлаштириш бўйича тарғибот ишларини кучайтириш топширилди.
Изоҳ (0)