Ўзбекистон Каспий денгизида ўз кемаларига эга бўлишдан манфаатдор. Бу ҳақда мамлакат Транспорт вазирлиги ҳузуридаги Транспорт ва логистикани ривожлантириш муаммоларини ўрганиш маркази директори Бекзод Холматов маълум қилди, деб хабар беради “Дунё” агентлиги.
Бекзод Холматов Каспий денгизида ўз кемаларининг мавжудлиги Транскаспий йўналиши бўйлаб юк ташиш ҳажмининг ошишига хизмат қилишини таъкидлаган. “Ўзбекистон ҳам Озарбайжон билан биргаликда кема қуриш лойиҳаларида иштирок этишдан манфаатдор. Тошкент бу борада бошқа давлатлар билан ҳамкорлик қилишга тайёр”, — дейди Холматов.
Унинг сўзларига кўра, ҳозирги пайтда Ўзбекистон Боку портида ўз терминалини қуриш бўйича ишларни олиб бормоқда.
Ўзбекистон дунёда “икки карра қулфланган” (double locked countries) тоифасига кирувчи икки давлатдан биридир. Бу шуни англатадики, океанларга чиқиш учун камида иккита давлат чегарасини кесиб ўтиш керак.
Шу билан бирга, транспорт вазири ўринбосари Ўзбекистон импортчилари Боку порти билан ҳамкорлик қилишдан манфаатдор эканини ва минерал ўғитлар терминалини узоқ муддатга ижарага олишни ёки уни яратишга сармоя киритишни мақсад қилганини айтган. Ҳозир бу масала ўрганилмоқда, техник-иқтисодий асослаш ишлари олиб борилмоқда.
Маълумот учун, 2022 йилда Ўзбекистондан Боку порти орқали экспорт-импорт юк ташиш ҳажми 904 минг тоннани ташкил этди, бу 2021 йилга нисбатан 65 фоизга кўпдир. Озиқ-овқат юкларини, жумладан, шакар хом ашёси, минерал ўғитлар ва контейнерларни ташиш ҳажми сезиларли даражада ошди.
2023 йилнинг февраль ойида Ўзбекистон юкларини Грузия портлари орқали узлуксиз ташиш йўлга қўйилиши, шунингдек, Ўзбекистон маҳсулотларини Қозоғистон портлари орқали ташиш йўлга қўйилиши мумкинлиги тўғрисида хабар берилганди. Июнь ойида эса Ўзбекистон Грузия портларида денгиз терминаллари қуриши кутилаётгани маълум бўлган эди.
Изоҳ (0)