Кенжа фарзанд бўлган: Фарғонада ўз жонига қасд қилган 16 ёшли қиз иши бўйича янги маълумотлар берилди

Фарғона вилояти Бувайда туманида 16 ёшли қиз ўзини осиб қўйгани ҳақида хабар берилган эди. Мазкур ҳолат бўйича янги тафсилотлар очиқланди.

Маълум қилинишича, марҳума оиладаги уч фарзанднинг энг кенжаси бўлган. У яшаган “Жийдали” МФЙ раиси бўлган воқеа ҳақида айтиб, оила намунали оилалардан эканини таъкидлади. 

“Уларни шунчаки мақтаб, вазиятдан чиқиб кетиш учун айтмаяпман. Ҳақиқатан ҳам бу оила намунали, бировга зиёни тегмаган, ўзини ўзи банд қилган. Онаси билан гаплашганимизда 10-15 кундан бери руҳиятида ўзгариш бўлиб қолгани, одамларни кўргиси келмаётганини айтганди. “Узоқларга ташлаб келинглар”, деяётган экан.

Ўша куни ҳам онаси билан бирга бўлган экан. Молга сув бериш учун молхонага кириб кетган. Онасини қўшниси чақириб қолган ва кўчага чиқиб кетган. Қайтиб келиб чақирса, овоз бермабди. Орқасидан кирса, осилган ҳолатда кўрибди”, — дейди маҳалла раиси. 

Қайд этилишича, марҳума молхонада рўмолига осилган ҳолда вафот этган. Марҳуманинг яқин қариндошлари сўнгги вақтларда унинг руҳияти бузилгани, ўз жонига қасд қилишида ҳеч кимнинг айби йўқлигини изоҳлаб, тушунтириш берган.

Айни пайтда мазкур ҳолат юзасидан терговга қадар текширув ҳаракатлари олиб борилмоқда.