Украина ташқи ишлар вазири Дмитрий Кулебанинг айтишича, Украина томони Россия президенти Владимир Путинга ишонмайди ва шунинг учун унинг иштирокидаги музокараларга рози бўлмайди. Муқобил вариант сифатида Кулеба Россия—Украина можаросини тугатиш бўйича музокараларда учинчи томон иштирок этиши мумкинлигини айтиб ўтди.
Дмитрий Кулеба Cоrriere della Serra нашрига берган интервьюсида Владимир Путин Украина билан музокараларда ҳамкорми ёки йўқми, деган саволга жавоб берар экан, “Йўқ. Путин бизнинг ҳамкоримиз эмас. Ишни билвосита олиб боришнинг бошқа дипломатик усуллари ҳам бор. Аммо биз Путин ва Зеленскийни ҳеч қачон бир столда кўра олмаслигимиз аниқ”, — деди украиналик вазир.
Кулебанинг қайд этишича, Украина Россия билан тинчлик музокараларини ўтказишга тайёр, лекин Владимир Путин билан эмас. Шунингдек, музокара ўтказишнинг асосий шарти рус қўшинлари Киев ўзиники деб ҳисоблаган ҳудудлардан олиб чиқиб кетилиши шарт.
Россия ва Украина ўртасидаги музокаралар 2022 йилнинг май ойида тўхтаб қолган эди.
Ўша йилнинг октябрь ойида Украина президенти Владимир Зеленский токи Владимир Путин президент экан, Россия раҳбари билан музокаралар ўтказиш имкониятини истисно қилувчи фармонни имзолади. 2023 йилнинг май ойида эса Зеленский Россия қўшинлари Украинадан олиб чиқилмагунча музокаралар бошланмаслигини айтди.
Изоҳ (0)