Тошкент вилояти ҳокими Зоир Мирзаев раҳбарлигида вилоятдаги мавжуд 22 та туман ва шаҳар ҳокимлари ва иш берувчилар иштирокида хорижда меҳнат қилаётган юртдошлар билан мулоқот бўлиб ўтди. Бу ҳақда мазкур тадбирда иштирок этган “Дарё” мухбири хабар берди.
Онлайн мулоқотда барча туман ва шаҳар ҳокимлари сўз олиб, ҳудудидаги бўш иш ўринлари ҳақида маълумот берган ва хорижда ишлаётган ўзбек мигрантларини ишга таклиф қилди.
Бугун чет давлатларда вилоятимизнинг 139 минг нафар фуқаролари, шундан 75,3 минг нафар эркак ва 63,7 минг нафар аёл меҳнат қилмоқда. Жами мигрантларнинг 21 минг нафари 30 ёшгача бўлган ёшлар ҳисобланади. Россия Федерациясида ишлаётган фуқароларимиз билан сектор раҳбарлари боғланиб, мавжуд вакант ва янги иш жойларини таклиф қилди. Телефон ва онлайн тарзида ўтказилган мулоқотларда иштирок этган 2 784 нафар фуқароларимиздан 444 нафари Ватанга қайтиш истагини билдирди, — дейди тадбирда сўз олган вилоят ҳокими Зоир Мирзаев.
.jpg)
Қайд этилишича, айни кунда вилоятда 7 081 та саноат корхонаси, 38 049 та кичик ва ўрта тадбиркорлик субъекти фаолият юритади. Улардаги мавжуд иш ўринлари сони 302 013 тани ташкил этади.
Эътиборлиси, ҳозирги кунда мазкур субъектларда 42 569 та бўш иш жойи мавжуд. Уларнинг 20 124 таси олий маълумот талаб қилинмайдиган, 3 295 таси малака талаб қилинмайдиган иш ўринларидир. Бундан ташқари, ҳурматли президентимиз томонларидан яратиб берилган шароитлар туфайли йил бошидан 22 та корхона янгидан очилиб, 7 минг 700 та янги иш жойлари яратилди. Президентимиз қарори билан вилоятдаги жами 16,6 минг гектар унумдор ер майдонлари фермер хўжаликларидан қайтарилиб, 7 458 гектари 10 йиллик, 9 088 гектари 30 йиллик муддатга 10 сотихдан 1 гектаргача деҳқон хўжалиги ташкил қилиш учун аҳолига берилмоқда, — дейди вилоят ҳокими.
Олмалиқ шаҳри ҳокими Қобил Ҳамдамовнинг маълумот беришича, 2023 йилнинг 1 январидан 1 июлига қадар 968 нафар олмалиқлик мигрант шаҳарга қайтган бўлиб, 755 нафари ишга жойлашган. Қолган 213 нафар фуқароларга ҳам иш бўйича таклифлар берилган.
Олмалиқ шаҳрида ватанига қайтган аёллар учун 2 миллион сўмдан 7 миллион сўмгача маоши бўлган ишлар, эркаклар учун эса 3 миллион сўмдан 15 миллион сўмгача маошли ишлар таклиф қилинмоқда, — дейди Олмалиқ шаҳри ҳокими.
Қобил Ҳамдамовнинг қўшимча қилишича, айни кунда Олмалиқда 7 мингта бўш иш ўрни бор. Йил якунигача яна 5 минггача иш ўрни яратилади.
Ангрен шаҳри ҳокими Алишер Райимовнинг тадбирда таъкидлашича, бугунги кунда шаҳарда 2 мингта бўш иш ўрни бор.
Бугунги кунда 5600 нафарга яқин ангренлик Россияда меҳнат қилиб келмоқда. Шу кунгача 1700 нафардан ортиқ фуқароларимиз ортга қайтди. Қайтганларнинг 70-80 фоизи доимий иш билан таъминланди. Оддий ишчиларга 2 миллион сўмдан 8 миллион сўмгача маош таклиф қиляпмиз, — дейди Ангрен шаҳри ҳокими.
Изоҳ (0)