Жорий йилнинг 1-ярмида Ўзбекистонга хорижий мамлакатлардан кўчиб келганларнинг 36,8 фоизини Россия фуқаролари ташкил этган. Бу рақамлар Статистика агентлигининг Ўзбекистоннинг демографик ҳолати бўйича берган маълумотида акс этган.
Қанча одам кўчиб келди?
Ўзбекистонга 2023 йилнинг январь июнь ойларида кўчиб келганлар сони 106,3 минг кишини ташкил этди. Шундан эркаклар 44,3 минг нафар, аёллар 62 минг нафар.
Мамлакатдаги шаҳар жойларига 81,9 минг, қишлоқ жойларига 24,4 минг хорижлик кўчиб келган.
Доимий яшашга келганлар
Статистика агентлиги маълумотларига кўра, 6 ой давомида мамлакатга кўчиб келганларнинг кўп қисми Россия ва қўшни давлатлар фуқаролари ҳиссасига тўғри келди.
“Республикага хорижий мамлакатлардан кўчиб келганларнинг асосий қисми Россия (жами хориждан кўчиб келганларга нисбатан 36,8 фоиз), Қозоғистон (24,2 фоиз), Тожикистон (13,1 фоиз), Қирғизистон (5,4 фоиз), Туркманистон (1,8 фоиз) ва бошқа мамлакатлар (18,7 фоиз) ҳиссасига тўғри келмоқда”, — дейилади манба ахборотида.
Жумладан, ярим йил ичида Ўзбекистонга доимий яшаш учун Россиядан 582 киши, Қозоғистондан 382 киши, Тожикистондан 207 киши, Қирғизистондан 86 киши кўчиб келган.
Ҳудудлар бўйича тақсимот
Январь–июнь ойларида Тошкент шаҳрига хорижий давлатлар фуқаролари энг кўп (46 минг 222 нафар—жами кўрсаткичнинг 31,3 фоизи) кўчиб келган. Энг кам хорижликлар эса Наманган вилоятига (1 минг 191 нафар) кўчган.
Кўчиб келганларнинг ўсиш суръати энг юқори даражаси Бухоро, Самарқанд, Хоразм, Сурхондарё, Навоий вилоятида кузатилган. Ўсиш суръатининг паст даражаси эса Жиззах, Қашқадарё, Сирдарё, Андижон вилоятлари ва Тошкент шаҳрида қайд этилган.
Ёш тақсимоти
Ярим йил мобайнида жами кўчиб келганларни ёш гуруҳлари бўйича тақсимлаганда, 83,2 фоиз хорижликлар меҳнатга лаёқатли ёшдагилар экани аниқланган. Шунингдек, 8,9 фоизи меҳнатга лаёқатли ёшдан кичиклар, 7,9 фоизи меҳнатга лаёқатли ёшдан катталар ҳиссасига тўғри келмоқда.
Маълумот учун, кўчиб келганлар сони – кўчиб келганларнинг абсолют миқдори, яъни муайян ҳудудга унинг ташқарисидан кўчиб келганлардан иборат. Ички ишлар органлари томонидан аҳолини яшаш жойи бўйича рўйхатга олишда тузиладиган кўчиб келишни статистик ҳисобга олиш варақаларини қайта ишлаш натижасида аниқланади.
Изоҳ (0)