Россия ҳукумати Норвегияни “дўст бўлмаган давлатлар” рўйхатига киритди, деб ёзмоқда “РБК”.
Бундай рўйхатни шакллантириш ҳақидаги қарорни Владимир Путин 2021 йилда Ғарб давлатларидан россиялик дипломатлар оммавий чиқариб юборилганидан кейин имзолаган эди.
2022 йил июль ойида рўйхатга Греция, Дания, Словения, Хорватия ва Словакия қўшилди. Бу мамлакатларда Россиянинг элчихоналари, консулхоналари ва вакиллик давлат идораларига ходим ёллаш имконияти чекланган.
Россия ҳукумати таъкидлаганидек, рўйхатда нафақат мамлакатларнинг номлари, балки Россия ҳудудидаги ўша мамлакатларнинг ваколатхоналари билан меҳнат шартномасини тузган фуқаролар номи ҳам келтирилган. Норвегиядан 27 киши “қора рўйхат”га кирган.
Апрель ойи ўрталарида Норвегия ҳукумати Россия элчихонасининг 15 нафар ходимини чиқариб юборган эди. Осло уларни “дипломат мақомига тўғри келмайдиган фаолият билан шуғулланувчи” разведкачилар деб атаган. Москва бу ҳаракатларни “душманлик ҳаракати” деб ҳисоблади ва ўн нафар норвегиялик дипломатни persona non grata деб эълон қилди. Россия Ташқи ишлар вазирлиги бошқа жавоб чораларини ҳам истисно қилмади.
Изоҳ (0)