Dunyo bo‘ylab 100 dan ortiq tibbiy jurnal yadroviy qurolni taqiqlashga chaqirdi.
“Xavf katta va tobora kuchayib bormoqda. Yadroviy davlatlar o‘z yadro arsenallarini ular bizni yo‘q qilishidan oldin yo‘qotishi kerak”, — deyiladi 11 ta yetakchi tibbiy jurnal, jumladan, British Medical Journal, The Lancet va Journal of the American Medical Association chiqargan qo‘shma bayonotda.
Murojaat mualliflari butun dunyo shifokorlarini fuqarolar va siyosatchilarni “yadro qurolining aholi salomatligi uchun katta xavfidan” ogohlantirishga chaqirdi. Hujjat Rossiyaning Ukrainaga qarshi urushda yadro qurolidan foydalanish haqidagi tahdidlari va Shimoliy Koreyada davom etayotgan raketa sinovlari fonida ommaga e’lon qilindi.
Butunjahon tibbiy muharrirlar assotsiatsiyasi (WAME) ta’kidlashicha, eksklyuziv kontent uchun odatda bir-biri bilan raqobatlashadigan nashrlarning ushbu qo‘shma murojaat uchun birlashgani e’tiborga molik.
“Bu hozirgi yadroviy inqirozning o‘ta og‘irligini ta’kidlaydi”, — dedi WAME vakillari.
Maqolada ta’kidlanishicha, dunyo bo‘ylab 13 mingta yadro kallagidan atigi 250 tasi qo‘llansa, 120 million kishi halok bo‘ladi va global iqlim buzilishi yuz beradi, bu esa yadroviy ocharchilik va yana ikki milliard odamning o‘limiga olib keladi.
Maqola 1970-yilda kuchga kirgan Yadro qurolini tarqatmaslik to‘g‘risidagi shartnoma bajarilishini nazorat qilish bo‘yicha konferensiya tashkil etish qo‘mitasining Venadagi yig‘ilishi oldidan chop etilgan.
Izoh (0)