Россиянинг Белгород вилоятида яшовчи мейн-кун зотига мансуб мушук хорижнинг йирик нашрлари эътиборини тортди. “Кефир лақабли дунёдаги энг йирик мушук” ҳақида The Sun, The Mirror ва New York Post нашрлари мақола эълон қилди.
Кефир ўтган йилнинг бошида Reddit юлдузига айланган эди. Ўшанда ижтимоий тармоқда мушук ва унинг эгаси Юлия Мининанинг суратлари тарқалганди. Суратларда мушукнинг жуда катта эканлиги ижтимоий тармоқлар фойдаланувчиларининг эътиборини тортган эди.
Мининлар оиласи Кефирни 2020 йилда боқиб олган. Ўшанда мушукнинг аввалги эгаси унинг ота-онаси ниҳоятда катта бўлганини айтган, бироқ Юлия жонивор шу даражада катта бўлиб кетишини хаёлига ҳам келтирмаган эди.
Ҳозир Кефир уч ёшда, унинг оғирлиги 12,5 килограммни ташкил этади. Мушук орқа оёқларига туриб олганида унинг бўйи Юлиянинг тўрт ёшли қизига етади. Мейн-кунлар тўрт ёшгача ўсишини инобатга олсак, кейинги йилда мушук бундан ҳам каттароқ бўлиши мумкин.
Кефирнинг ташқи кўриниши жиддий ва қўрқинчли туюлса-да, у аслида жуда ёқимтой. Мушукнинг ўз стули бор, ҳамма овқатланаётган пайтда жонивор ҳам ўз жойини эгаллайди.
Изоҳ (0)