Bloomberg Туркманистон Европа Иттифоқига газ етказиб беришни истаса, тезда ҳаракат қилиши кераклиги ҳақида мақола чоп этди.
Мақолада Туркманистон Ташқи ишлар вазирлигининг сўнгги баёнотига жавоб берилади. Вазирлик 24 июль куни Транскаспий газ қувури қурилиши мумкинлиги ҳақида баёнот берган:
“Туркманистон газ қувури қурилишига ҳеч қандай сиёсий, иқтисодий ва молиявий омиллар тўсқинлик қилмаслигига ишончи комил. Аксинча, Транскаспий қувури мутлақо реал лойиҳа бўлиб, иқтисодий нуқтаи назардан оқланган, Евросиёда энергия хавфсизлигини таъминлашга сезиларли ҳисса қўшади.
Бу транзит томоннинг фойдалари ва манфаатларини ҳисобга олган ҳолда европалик истеъмолчилар учун хом ашё манбаларидан узоқ муддатли ва узлуксиз фойдаланишни таъминлайди”, — дейилган баёнотда.
Bloomberg таҳлилчилари Туркманистонда жаҳон бозорларига газ етказиб бериш учун яхши имкониятлар мавжудлиги, бироқ бунга кўплаб омиллар тўсқинлик қилаётганини билдирди.
- Хусусан, мамлакат санкциялар остидаги Россия билан тарихан ҳамкорликка эътибор қаратган. Аммо Туркманистоннинг Европа давлатлари билан алоқалари ёмон йўлга қўйилган. 2023 йил Туркманистон президенти Брюсселга ташриф буюриб, Европа Иттифоқи институтлари раҳбарлари билан учрашишни режалаштирган.
- Туркманистон ва Озарбайжон ўртасидаги денгиз тубини чегаралаш масалалари ҳал этилмаган. Лойиҳанинг қиймати 2 миллиард долларгача баҳоланмоқда, мамлакатлар харажатларни ўзаро қандай тақсимлаши аниқ эмас.
Транскаспий газ қувурининг қурилиши йиллар давом этиши мумкин. Айни пайтда европалик харидорлар АҚШ ва Қатардан газ импорт қилмоқда. Бундан ташқари, таҳлилчилар 15-20 йил ичида Европа муқобил энергия манбаларига ўтишини билдирди.
Bloomberg Туркманистон Энергетика вазирлиги ва “Туркмангаз” давлат концернидан изоҳ ололмаган, бу эса мамлакат европалик ҳамкорлар билан мулоқот қилишга унчалик мослашмаганини билдириши таъкидланади.
Turkmen News нашри камчиликлар қаторида туркман амалдорлари ва газ ишчиларининг коррупцияси ва нопрофессионаллигини келтириб ўтади. Бошқарувчилар лавозимларга малакага қараб эмас, балки алоқалар туфайли тайинланади.
“Ҳар қандай лойиҳада, янги объектлар қуришдан тортиб жорий таъмирлашгача кимдир пул ишлаб олишга ҳаракат қилади. Бу тўғридан тўғри зарарга олиб келади: қимматбаҳо сенсорларни алмаштиришдан бош тортиб, паст сифатли кимёвий моддаларни сотиб олиш каби.
Оқибатда ўтган қиш мавсумида ‘Галгиниш’ конида авария содир бўлиб, Ўзбекистонга газ етказиб бериш бир неча кунга тўхтаб қолганди”, — дейилади хабарда.
Изоҳ (0)