Хитой ва Туркманистон дунёдаги иккинчи йирик газ кони ҳисобланган “Галкиниш”ни ўзлаштиришнинг иккинчи босқичини амалга оширишни тезлаштириш ниятида. Бу ҳақда “Нейтральний Туркменистан” нашри хабар берди.
“Бу босқич Ўзбекистон, Тожикистон ва Қирғизистон ҳудуди орқали қурилиши режалаштирилган янги қувур орқали туркман газини етказиб бериш ҳажмини оширади”.
Туркманистон президенти Сердар Бердимуҳамедов 18 май куни амалий ташриф билан Хитойга келди. Хитой раиси Си Цзиньпин таклифига биноан у Сиан шаҳрида бўлиб ўтадиган “Марказий Осиё—Хитой” саммитида иштирок этади ва Хитой раҳбарияти билан алоҳида учрашув ўтказади.
“Юқори даражадаги навбатдаги музокаралар якунларига кўра, қатор ҳужжатлар имзоланиши режалаштирилган”
“Галкиниш” саноат ўзлаштиришининг биринчи босқичида CNPC (Хитой), LG ва Hyundai (Жанубий Корея), Petrofac шунингдек, ва Gulf Oil & Gas Fze (БАА) иштирок этган.
Йилига 30 миллиард куб метр газ ишлаб чиқариш қувватига эга, қиймати 10 миллиард доллар бўлган лойиҳа асосан Хитой тараққиёт банки кредити ҳисобидан амалга оширилган.
Иш 2013 йилда якунланган ва орадан етти йил ўтиб Туркманистон ҳукумати газни Ўзбекистон ва Қозоғистон орқали транзит экспорт қилиш ҳисобига қарзни тўлаганини маълум қилган.
2022 йил март ойи охири ҳолатига кўра, “Галкиниш” иншоотлари ишга туширилгандан бери ишлаб чиқарилган газнинг умумий ҳажми 132 миллиард куб метрни ташкил қилган. Туркманистон ҳудудидан Хитойга табиий газ Багтиярлик контракт майдонидан етказиб берилмоқда. CNPC у ерда 2007 йилдан бери фаолият олиб боради.
2009 йилдан 2022 йил декабригача Ўзбекистон ва Қозоғистон орқали Хитойнинг 27 вилояти, муниципалитетлари, автоном районлари ва Гонконг махсус маъмурий районига 350 миллиард куб метрдан ортиқ туркман гази етказиб берилган.
Азиз Бояров, Ашхобод
Изоҳ (0)