Туркманистонда “Туркмангаз” давлат концерни раисининг собиқ ўринбосари Атамурат Чариев “Галкиниш” конида содир бўлган авария сабабли саккиз йилга озодликдан маҳрум этилди. Бу ҳақда Turkmennews хабар берди.
Суд қачон ва қаерда бўлиб ўтгани ҳозирча номаълум. Жазо муддатидан ташқари, амалдорга катта молиявий даъво илгари сурилган. Қишдаги ушбу авария туфайли аномал совуқда Ўзбекистонга газ етказиб бериш бир неча кунга тўхтатилганди.
Мамлакатдаги расмий оммавий ахборот воситалари ҳукм ҳақида хабар бермаган. Туркманистон ҳукумати қўшни давлатга газ таъминотидаги узилишни ўз фуқароларидан яширишга уринган, дейилади хабарда.
Чариев нафақат саккиз йилга қамалган, балки етказилган зарарни катта ҳажмда қоплашга ҳам мажбур қилинган. Газ етказиб беришдаги узилиш иши бўйича бошқа айбланувчиларнинг тақдири ҳозирча номаълум.
2023 йил январь ойида “Галкиниш”дан газ етказиб бериш тўхтатилишига сифатсиз қуритиш датчиклари бузилгани, шунингдек, ёқилғининг музлашига йўл қўймайдиган реактивлар етишмаслиги сабаб бўлган.
12 январдан Туркманистон “Галкиниш” конидаги техник носозликлар туфайли Ўзбекистонга газ етказиб беришни тўхтатган. Аномал совуқ конда гидрат ҳосил бўлишига олиб келган. Шу сабабларга кўра Туркманистон–Ўзбекистон–Қозоғистон–Хитой газ қувури орқали Хитойга газ экспорти сезиларли даражада камайган.
“Галкиниш” конидан Ўзбекистонга газ етказиб бериш мажбурий тўхтатилгани ортидан олти кун давомида етказилган зарар миқдори 59,7 миллион долларни ташкил қилган.
13 январь куни Сердар Бердимуҳамедов нефть ва газ саноатига масъул вазир ўринбосари Шоҳим Абдраҳмонов ва “Туркмангаз” раҳбари Ботир Амановга сўнгги огоҳлантириш билан қаттиқ танбеҳ берган. Президент норозилигининг аниқ сабаблари айтилмаган, бироқ Абдураҳмонов ва Аманов кондаги техник носозликлар учун жаримага тортилган, бунга газ экспортининг тўхтаб қолгани сабаб бўлган бўлиши мумкин.
Атамурат Чариев 2019—2021 йилларда музлашдан ҳимоя қилувчи реагентларни харид қилиш учун бевосита жавобгар бўлган. Манбаларнинг таъкидлашича, у бир неча бор яхши қиммат антифриз етказиб бериш бўйича шартномалар тузган, аслида эса арзон аналогларни сотиб олган.
Амалдор бу фирибгарликдан тушган даромадни давлат концернининг ўша пайтдаги раҳбари Мурод Арчаев ва газ қазиб олиш бошқармаси бошлиғи Гадам Ўраниёзов билан бўлишиб олган.
Газ етказиб беришдаги авариядан кейин Чариев ҳукумат идораларидан бирига мутахассис лавозимига ўтказилган. Эҳтимол, эндигина бош вазир ўринбосари этиб тайинланган Аширгули Беглиев унга қийин пайтларда “лавозимида ўтириш” имкониятини бермоқчи бўлган. Бироқ бу иш бермаган ва 18 март куни Чариев ҳибсга олинди.
Изоҳ (0)