Польша Ташқи ишлар вазирлиги Беларусь ҳарбий вертолётлари мамлакат ҳаво ҳудудини бузгани сабабли беларус дипломатини вазирликка чақиртирди. Бу ҳақда “РБК-Украина” хабар берди.
Польша ташқи ишлар вазири ўринбосари Павел Яблонский бундай ҳолатлар ҳар бир давлатда бўлишини айтди. Ҳолат юзасидан Беларусь бўйича муваққат ишлар вакилига норозилик билдирилган.
Яблонскийга кўра, Варшава бундан хулоса чиқармоқда ва ўз чегарасини ҳимоя қилишни кучайтирмоқда.
“Польша иттифоқчилари чегарани бузгани ҳақида ҳарбий каналлар орқали хабардор қилинган. Агар чегарада панжара ўрнатиш каби профилактика чоралари бўлмаганида, Беларуснинг ўнлаб, балки юзлаб провокациялари содир бўлган бўларди”, — дейди у.
Унинг таъкидлашича, Беларусь дипломати билан Польша Ташқи ишлар вазирлигида суҳбат “жуда қисқа” бўлган.
“Биз ҳаво ҳудудининг бузилиши, шунингдек, Украинага қарши ҳаракатлар авж олгани муносабати билан кескин норозилик билдирдик, чунки бу урушда Беларусь ҳам иштирок этмоқда”, — деб тушунтирди Яблонский.
Беларусь томонига бошқа даъволар ҳам берилган. Хусусан, Польша “Вагнер” жангариларининг Беларусга кўчиб ўтиши ва мигрантларнинг Беларусь-Польша чегарасини ноқонуний кесиб ўтишга уринишлари туфайли чегарадаги хавфсизлик даражаси пасайганини қайд этган.
“Биз бундан ўзимизни ҳимоя қиламиз”, — дея хулоса қилган Польша ташқи ишлар вазири ўринбосари.
Беларусь ҳарбий вертолётлари Польша ҳудудига кирди
Беларуснинг иккита вертолёти 1 август куни Польша ҳаво ҳудудини бузди. Вертолётлар машғулотлар ўтказган ва бу ҳақда Беларусь томони Польшани олдиндан хабардор қилган.
Ҳаво чегарасини кесиб ўтиш Беловежа аҳоли пункти ҳудудида жуда паст баландликда содир бўлган, бу эса радар тизимлари томонидан аниқлашни қийинлаштирган. Воқеа ҳақида НАТО ҳам хабардор қилинган. Гап Ми-24 ва Ми-8 вертолётлари ҳақида кетмоқда.
Изоҳ (0)