Эрон жануби-шарқида жойлашган Сейистон ва Балужистон вилоятларида сув тошқини оқибатида камида 400 киши жабр кўрди. Бу ҳақда ISNA агентлиги хабар берди.
Эрон Қизил Ярим Ой жамиятининг маҳаллий бўлими баёнотида айтилишича, 15 та қутқарув гуруҳи вилоятнинг жануби-ғарбида жабрланганларга ёрдам кўрсатган. 300 дан ортиқ киши Қизил Ярим Ой жамияти чодирларига жойлаштирилди, жабрланганларга зарур ёрдам кўрсатилди: уларга озиқ-овқат, иссиқ кийим-кечак ва зарур буюмлар топширилди.
Сейистон ва Балужистон вилояти марказий тумани раҳбарининг айтишича, кучли ёғингарчилик туфайли кўплаб инфратузилма объектлари, жумладан, қишлоқ хўжалиги объектлари зарар кўрган.
Эроннинг энг қурғоқчил вилоятларидан бири бўлган Сейистон ва Балужистонда ёзда сув тошқинлари одатий ҳол ҳисобланади.
30 июль куни Tasnim агентлиги 133 киши кучли ёмғир ва дарё тошқинларидан жабр кўрганини маълум қилганди. Шу билан бирга, метеорологлар Эрон жануби-шарқида қум бўронлари тез орада қайта бошланишидан огоҳлантирмоқда.
Изоҳ (0)