Австралия шимоли-шарқида йирик Талисман Сабре машқларида қатнашаётган МРҲ-90 Таипан ҳарбий вертолёти ҳалокатга учради, деб ёзмоқда ABC. Bloomberg хабарига кўра, машғулотлар тўхтатилган.
Вертолёт 28 июль куни кечқурун Линдман ороли яқинида денгизга қулаган. Бортда тўрт киши бўлган, вертолёт бўлаклари топилган бўлса-да, экипаждан ҳали дарак йўқ. Қидирув операцияси давом этмоқда.
Талисман Сабре ўқув машғулотлари ҳар икки йилда турли мамлакатлардан 30 мингдан ортиқ ҳарбий хизматчилар, шу жумладан АҚШнинг муҳим контингенти иштирокида ўтказилади. Манёврлар икки ҳафта ичида амалга оширилиши режалаштирилган эди. Bloomberg маълумотларига кўра, машғулотлар орқали Хитойдан эҳтимолий таҳдидга қарши АҚШ ва Австралиянинг бирлигини намойиш этиш мақсад қилинган.
Бу йил Талисман Сабре машқлари аввалги йилларга қараганда энг катта кўламда ташкил этилди, манёврлар давомида денгиз десантчиларининг қўниш амалиёти ишлаб чиқилди. Машқлар АҚШ Давлат котиби Энтони Блинкен ва Мудофаа вазири Ллойд Остиннинг австралиялик ҳамкасблари билан музокаралар ўтказиш учун мамлакатга ташрифи вақтига тўғри келди.
Ҳалокатга учраган вертолёт Франко-Германия консорсиуми Эуроcоптер томонидан ишлаб чиқилган эди.
Бу воқеа МРH90 Таипан вертолётларидан фойдаланиш бўйича муҳокамаларни жонлантирмоқда, деб ёзади ABC. Гап шундаки, баҳорда худди шу сериядаги яна бир вертолёт терроризмга қарши кураш машқлари чоғида сувга қулаган эди. Бортда ўн нафар аскар бўлган, улар омон қолган.
Изоҳ (0)