Европа Марказий банки кетма-кет тўққизинчи марта асосий ставкани оширди

Европа Марказий банки бошқарувчилар кенгаши учта асосий фоиз ставкаларини 0,25 фоиз пунктга оширишга қарор қилди. Бу ҳақда регулятор сайтида чоп этилган пресс-релизда маълум қилинди.

Ставканинг мазкур ошиши кетма-кет тўққизинчиси ҳисобланади.

Кредитлар бўйича базавий ставка йиллик 4 фоиздан 4,25 фоизгача, депозитлар бўйича ставка 3,75 фоизгача, қисқа муддатли кредитлар бўйича эса 4,5 фоизгача оширилди. Регуляторнинг қарори таҳлилчилар кутилмаларига тўғри келган.

Баъзи кўрсаткичлар пасайиш белгиларини кўрсатаётган бўлса-да, асосий инфляция умумий даражада юқорилигича қолмоқда, дейилади пресс-релизда.

Регуляторнинг прогнозларига кўра, 2023 йилда Европа Иттифоқида инфляция 5,1 фоизни ташкил этади, 2024 йилда 3 фоизга, 2025 йилда эса 2,3 фоизгача пасаяди. 

Сентябрга режалаштирилган навбатдаги йиғилишда Европа Марказий банки инфляцияни пасайтириш бўйича мақсадларга эришишга қараб ставкани яна ошириши ёки уни сақлаб қолиши мумкин, дейди таҳлилчилар.

Мутахассислар 14 сентябрдаги йиғилишда регулятор ставкани яна 25 базавий пунктга оширишини тахмин қилмоқда.