Qarshi davlat universitetini quyosh panellari bilan taʼminlash oyiga 153 mln so‘m pulni tejab, yiliga 734 mln so‘m daromad qilish imkonini yaratdi

Qarshi davlat universitetini quyosh panellari bilan taʼminlash oyiga 153 million so‘m pulni tejab, yiliga 734 million so‘m daromad qilish imkonini yaratdi. Bu haqda “Daryo”ga muassasa axborot xizmati rahbari Oybek Yusupov xabar berdi.

Taʼkidlanishicha, OTMda quyosh panellarini o‘rnatish ishlari yakunlangan.

“Bugun yurtimizda iqtisodiyot tarmoqlari, ijtimoiy soha obyektlari hamda aholi turar joylarida muqobil energiyadan foydalanish borasida qator ustuvor loyihalar amalga oshirilmoqda. Davlatimiz rahbarining joriy yil 16-fevraldagi ‘2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari to‘g‘risida’gi qarori esa mamlakatimizda energiya taqchilligi qoplanishini taʼminlashga qaratilgan muhim hujjat bo‘ldi. Qayta tiklanuvchi energiya manbalarini va energiya tejovchi texnologiyalarni joriy etish borasida Qarshi davlat universitetida ham keng ko‘lamdagi ishlar amalga oshirilyapti. Xususan, oliy taʼlim muassasasida hozirgi kunga qadar jami 910 kVt/soat elektr energiyasi ishlab chiqaruvchi quyosh panellari o‘rnatildi. Shundan foydalanishga yaroqsiz, sho‘rlanish darajasi yuqori, sobiq chiqindixona joylashgan yer maydonida bunyod etilgan geliopoligonda 510 kVt/soat quvvatli quyosh panellari o‘rnatildi”, — deydi Oybek Yusupov.

Qo‘shimcha qilinishicha, endilikda universitetning barcha binolari quyosh panellari orqali ishlab chiqariladigan elektr energiyasi bilan taʼminlanmoqda.

“Natijada bir oyda 152 880 kVt elektr energiyasi ishlab chiqarilib, 152 million 880 ming so‘m mablag‘ tejashga erishildi. Shuningdek, hozirda soatiga 254,8 kVt ortiqcha ishlab chiqarilgan elektr energiyasini Qarshi shahar elektr tarmoqlari korxonasiga sotish bo‘yicha shartnoma imzolash jarayonlari ketmoqda. Natijada bir oyda 61 million 152 ming so‘m (61 152 kVt) va bir yilda qariyb 734 million so‘m (733 824 kVt) daromad olish imkoniyati yaratiladi”, — deydi masʼul.

Qo‘shimcha qilinishicha, oliygoh hududida 89 dona 200 Vatt quvvatga ega quyosh panelli tungi yoritgichlar ham o‘rnatilgan.