Олий Мажлис Қонунчилик палатасидаги “Адолат” СДП фракциясининг навбатдаги йиғилишида “Ўзбекистон Республикасининг Конституциявий суди тўғрисида”ги Конституциявий қонунга ўзгартириш ва қўшимчалар киритиш ҳақидаги қонун лойиҳаси кўриб чиқилди. Бу ҳақда парламент қуйи палатаси матбуот хизмати хабар берди.
Қайд этилишича, янги таҳрирдаги Конституцияда Ўзбекистон Конституциявий суди ҳамда унинг ваколатларига доир янги нормаларнинг белгилангани Конституциявий суд фаолиятини ягона ёндашув асосида ислоҳ қилиш зарурлигини тақозо этмоқда.
Мазкур қонун лойиҳаси билан “Ўзбекистон Республикасининг Конституциявий суди тўғрисида”ги Конституциявий қонунга Конституциявий суд томонидан Ўзбекистон референдумига чиқарилаётган масалаларнинг Конституцияга мувофиқлиги тўғрисида хулоса берилишини, шунингдек, Конституциявий суднинг судьялари қайта сайланиш ҳуқуқисиз ўн йиллик муддатга сайланишини назарда тутувчи ўзгартириш ва қўшимчалар киритилмоқда.
“Қонун лойиҳаси Ўзбекистон Конституцияси олий юридик кучга эгалигидан келиб чиқиб, Конституция ва қонунларнинг сўзсиз устуворлиги ҳамда уларнинг бир хилда амалда бўлишини таъминлайди”, — дейилади хабарда.
Фракция аъзолари партия сайловолди дастуридаги мақсад ва ғоялардан келиб чиққан ҳолда мазкур қонун лойиҳаси муҳим консептуал ҳужжат экани, ушбу йўналишдаги қонунчиликнинг узвийлиги ва давомийлигини таъминлашда алоҳида аҳамият касб этишини эътироф этиб, уни қўллаб-қувватлаган. Йиғилишда кун тартибидаги бошқа масалалар ҳам депутатлар томонидан атрофлича кўриб чиқилиб, тегишли қарор қабул қилинган.
Май ойида президент томонидан имзоланган фармонда янги таҳрирдаги Конституция бўйича давлат фуқаролик хизматчилари ва суд-ҳуқуқ тизими ходимларини ўқитиш масаласи кўзда тутилаётгани тўғрисида хабар берилганди.
Изоҳ (0)