“Энг катта гонорарни Райҳон берган”. Йигитали Мамажонов собиқ рафиқаси билан ижодий ҳамкорлик ва клиплар орқали танилганидан уялмаслиги ҳақида (видео)

Таниқли актёр Йигитали Мамажонов “Севимли” телеканалининг “Машҳурлар” кўрсатувига берган интервьюсида ижодидаги энг катта гонорарни собиқ рафиқаси Райҳоннинг клипидан олгани, клиплар орқали танилганидан уялмаслиги ҳақида гапирди.

“Қўлимга оз-мунча пул беришган, лекин у пул менга керакмас эди, сабаби маза қилиб ижод қилганман”

Бу клип трамплин бўлди. Ундан кейин суратга Лола чақирди. Унинг клипида ҳам ҳом видео эди. Ўшанда бу сўзни биринчи марта эшитганман. Камерани ўзимга бериб қўйишди, реал ҳаётни кўрсатиб бергандек бўласиз. Улар бошқача ғоялар билан мухлисларни ҳайратда қолдирадиган ижодкорлар эди. Лоладан кейин Райҳон “Самода” деб номланган клипига чақирди. Энг катта гонорарни ҳам Райҳоннинг клипидан олганман, чунки ўша пайтда ўзимни юлдуз деб ўйлаганман. Биринчи, иккинчи клипларим билан танилиб бўлгандим. Қўлимга оз-мунча пул беришган, лекин у пул менга керакмас эди, сабаби маза қилиб ижод қилганман.

“Клиплар сабаб Йигитали Мамажонов бўлдим”

Агар умумий хулоса қиладиган бўлсак, менинг ҳаётимда клиплар алоҳида ўринга эга, чунки ўша клиплар сабаб Йигитали Мамажонов бўлдим, ҳозирги даражага етиб келдим. Бу нарсаларни инкор этиб бўлмайди. Инсон барибир кимлигини унутиши керак эмас. Мен бу нарсадан уялмайман ва ғурурланиб айтишимнинг сабаби айнан клиплар профессионализм даражасига чиқиб, сюжетлар қизиқарли чўққига ета бошлаганида ижодимни бошлаганман. Бу ҳам бир омад. Институтдаги гуруҳимизда 25 та бола бор эди, орасида мендан ҳам истеъдодлилари бўлган. Бироқ клипларга айнан мени чақиришган. Ўртача истеъдодли бола эдим, ўзимни зўрман дея олмасдим.