Фарғона шаҳар Янги Аср кўчасида жойлашган қурилиши тугалланмаган бино ёнидан 20 июль куни 11 ёшли қизчанинг мурдаси зўрлаш ва қотиллик аломатлари билан топилди. Бу ҳақда Бош прокуратура матбуот хизмати хабар берди.
Маълум қилинишича, мазкур ҳолат юзасидан Жиноят кодексининг 97- (қасддан одам ўлдириш), 118- (номусга тегиш) ва 119-моддалари (жинсий эҳтиёжни зўрлик ишлатиб ғайритабиий усулда қондириш) билан жиноят иши қўзғатилган.
Тергов давомида ушбу жиноятни содир этишда гумонланаётган шахс (2006 йилда туғилган) аниқланиб, процессуал тартибда ушланган. Воқеа содир бўлган куни гумонланувчининг ёнида бўлган икки нафар шерикнинг ушбу жиноятга алоқадорлиги ҳам текширилмоқда.
“Содир этилган қилмиш жинсий жиноятлар тоифасига тегишли бўлганлиги сабабли бошқа тафсилотлар ошкор қилинмайди”, — дейилади хабарда.
Бундан олдин Тошкент шаҳар Янгиҳаёт туманида 12 ёшли қизни зўрлаб, сўнг уни ўлдирган эркак иши судга юборилгани ҳақида хабар берилган эди. Суд ҳукми билан ушбу жиноятни содир этган шахс ўта хавфли рецидивист деб топилиб, унга узил-кесил умрбод озодликдан маҳрум қилиш жазоси тайинланган.
Изоҳ (0)