“Сўнгги олти йил ичида Ўзбекистон иқтисодиёти 1,4 баробарга ўсди” — Шерзод Кудбиев БМТ форумида иштирок этди

Иқтисодиёт ва молия вазири Шерзод Кудбиев бошчилигидаги Ўзбекистон делегацияси АҚШнинг Нью-Йорк шаҳрида БМТ Иқтисодий ва ижтимоий кенгашининг юқори даражадаги сиёсий форумида иштирок этди. Бу ҳақда вазирлик матбуот хизмати хабар берди.

Маълум қилинишича, Шерзод Кудбиев форум доирасида ташкил этилган “Барқарор ривожланиш мақсадлари (БРМ) Саммити сари жадаллик” мавзусидаги умумий мунозараларда нутқ сўзлаган. Вазирга кўра, Ўзбекистон иқтисодиёти охирги олти йилда сезиларли ўсишга эришган.

“Сўнгги олти йил давомида Ўзбекистон иқтисодиётининг реал ўсиши даражаси 1,4 баробарни ташкил этди. Бу даврда мактабгача таълим қамрови 3 баробар, олий таълим қамрови эса 4 баробар ошди. 200 мингдан ортиқ янги кичик ва ўрта корхоналар ўз бизнесини бошлади. 2020 йилда Ўзбекистонда биринчи бор камбағалликни кисқартириш давлат сиёсати кун тартибининг муҳим қисми деб эълон қилинди”, — деган вазир.

Форумда тадбир иштирокчиларига Барқарор ривожланиш мақсадларининг Ўзбекистонда жорий этилиши ҳолати, ИМҲ муҳокамалари, иқтисодиётда олиб борилаётган ўзгаришлар, жумладан, 2022—2026 йилларга мўлжалланган Янги Ўзбекистоннинг тараққиёт стратегияси доирасида тадбиркорликни ташкил этиш ва ривожлантириш учун берилаётган имкониятлар халқаро оммага ёритиб берилди.

Шунингдек, иқтисодиётда бозор механизмларининг жорий этилиши, қишлоқ хўжалиги ислоҳотлари, инфратузилмани ривожлантириш, таълим ва соғлиқни сақлашда эришилган натижалар ҳақида гапирилган.

Форумда 39 та мамлакат ўз Ихтиёрий миллий ҳисоботларини тақдим этмоқда. Улардан 36 таси, шу жумладан Ўзбекистон ҳам, ИМҲни иккинчи маротаба топширмоқда. Тадбир давомида Ўзбекистон 2030 йилгача бўлган глобал кун тартибини амалга ошириш бўйича қатъий мажбуриятларини маълум қилди.

Кўп мамлакатлар саноқли (4-5 та) БРМлар бўйича натижаларга эришган бўлса, Ўзбекистон Республикаси тўғри олиб борилган иқтисодий, ижтимоий ва бошқа соҳалардаги ислоҳотлари орқали деярли барча қабул қилган 16та мақсадларида ютуқларини намойиш этди.

Маълумот учун, 2030 йилгача глобал кун тартибида 17 та БРМ тасдиқланган бўлиб, Ўзбекистон 16 таси бўйича мажбуриятларни олган.