Iqtisodiyot va moliya vaziri Sherzod Kudbiyev boshchiligidagi O‘zbekiston delegatsiyasi AQSHning Nyu-York shahrida BMT Iqtisodiy va ijtimoiy kengashining yuqori darajadagi siyosiy forumida ishtirok etdi. Bu haqda vazirlik matbuot xizmati xabar berdi.
Maʼlum qilinishicha, Sherzod Kudbiyev forum doirasida tashkil etilgan “Barqaror rivojlanish maqsadlari (BRM) Sammiti sari jadallik” mavzusidagi umumiy munozaralarda nutq so‘zlagan. Vazirga ko‘ra, O‘zbekiston iqtisodiyoti oxirgi olti yilda sezilarli o‘sishga erishgan.
“So‘nggi olti yil davomida O‘zbekiston iqtisodiyotining real o‘sishi darajasi 1,4 barobarni tashkil etdi. Bu davrda maktabgacha taʼlim qamrovi 3 barobar, oliy taʼlim qamrovi esa 4 barobar oshdi. 200 mingdan ortiq yangi kichik va o‘rta korxonalar o‘z biznesini boshladi. 2020-yilda O‘zbekistonda birinchi bor kambag‘allikni kisqartirish davlat siyosati kun tartibining muhim qismi deb eʼlon qilindi”, — degan vazir.
Forumda tadbir ishtirokchilariga Barqaror rivojlanish maqsadlarining O‘zbekistonda joriy etilishi holati, IMH muhokamalari, iqtisodiyotda olib borilayotgan o‘zgarishlar, jumladan, 2022—2026-yillarga mo‘ljallangan Yangi O‘zbekistonning taraqqiyot strategiyasi doirasida tadbirkorlikni tashkil etish va rivojlantirish uchun berilayotgan imkoniyatlar xalqaro ommaga yoritib berildi.
Shuningdek, iqtisodiyotda bozor mexanizmlarining joriy etilishi, qishloq xo‘jaligi islohotlari, infratuzilmani rivojlantirish, taʼlim va sog‘liqni saqlashda erishilgan natijalar haqida gapirilgan.
Forumda 39 ta mamlakat o‘z Ixtiyoriy milliy hisobotlarini taqdim etmoqda. Ulardan 36 tasi, shu jumladan O‘zbekiston ham, IMHni ikkinchi marotaba topshirmoqda. Tadbir davomida O‘zbekiston 2030-yilgacha bo‘lgan global kun tartibini amalga oshirish bo‘yicha qatʼiy majburiyatlarini maʼlum qildi.
Ko‘p mamlakatlar sanoqli (4-5 ta) BRMlar bo‘yicha natijalarga erishgan bo‘lsa, O‘zbekiston Respublikasi to‘g‘ri olib borilgan iqtisodiy, ijtimoiy va boshqa sohalardagi islohotlari orqali deyarli barcha qabul qilgan 16ta maqsadlarida yutuqlarini namoyish etdi.
Maʼlumot uchun, 2030-yilgacha global kun tartibida 17 ta BRM tasdiqlangan bo‘lib, O‘zbekiston 16 tasi bo‘yicha majburiyatlarni olgan.
Izoh (0)