Оҳангаронда йил охиригача Марказий Осиёда ягона бўлган 15 млн долларлик чиқинди полигони қурилади

Тошкент вилояти Оҳангарон тумани ҳудудида 2023 йил ноябрь ойигача янги маиший чиқинди полигони ташкил этилади. Бу ҳақда Экология вазирлиги уюштирган пресс-тур давомида Тошкент шаҳар “Махсустранс” ишлаб чиқариш бошқармаси бошлиғи ўринбосари Исмоил Саъдуллаев маълум қилди.

Айтилишича, “Махсустранс” унитар корхонасига ҳукумат турли техника ва транспортлар сотиб олиш, янги полигон қуриш учун кредит ажратган.

“Давлат бизга 69 миллион долларлик имтиёзли кредит берган. Бунинг ҳисобидан 341 та янги техника ва шаҳар бўйлаб жойлаштириш учун 18 мингта чиқинди қутиси сотиб олдик. Бизнинг махсус транс шаҳарнинг 72 фоизига хизмат қилади. Кунига 2 300—2 400 тонна чиқинди етиб келади. Ҳар куни 260 та транспорт эрталабки 6 дан кечки 18 гача иш фаолиятида бўлади, бундан ташқари, туманларда 2–3 тадан навбатчи экипажларимиз бор. Улар, асосан, фуқаролар томонидан белгиланмаган ҳудудларга ташлаб кетилган чиқиндиларни етказиб бериш билан шуғулланади. Ҳозир президент қарори ижроси бўйича саралаш учун мўлжалланган турли рангдаги қутилар фойдаланишга топширилган. Яъни қоғоз маҳсулотлар, пластик чиқиндилари ва номаҳсулотлар ажратилган, чунки улар алоҳида жойларда утилизация қилинади. Бундан ташқари, қурилиш чиқиндилари учун алоҳида транспорт ажратганмиз”, — деб айтди Исмоил Саъдуллаев.

Бошқарма бошлиғининг таъкидлашича, берилган кредит асосида Марказий Осиёда ягона бўлган 15 миллион долларлик янги полигон қурилмоқда.

“Полигон 2023 йил охиригача ишга тушади. У асосан чиқиндиларни саралаш ва қайта ишлашга мўлжалланган бўлади. Бу ерда чиқиндилар аввал сараланади, сўнг икки метр чиқинди ва ярим метр тупроқ билан ёпилиб, утилизация қилинади. Бундан ташқари, 2024 йил июнь ойигача чиқиндиларни ёқиб, уларнинг газидан электр энергияси оладиган янги полигон қурилади. Бу бўйича Жанубий Корея компаниялари билан ҳамкорлик қиляпмиз. Бу усулнинг яхши тарафи шундаки, ерости сувларига ҳеч қандай зарар етмайди, атмосферага чиқаётган газларни йўқ қилади”, — дея тушунтирди у.

Исмоил Саъдуллаевнинг таъкидлашича, бошқарманинг бу йилги режаси чиқиндиларни қайта ишлаш ҳажмини 50 фоизга кўтариш ҳисобланади.