Ўзбекистон ва Европа футболида трансферлар мавсуми давом этмоқда. “Дарё” трансфер оламида рўй берган энг сўнгги воқеаларни бир саҳифага йиғди.
“Бухоро” клуби бир йўла олти нафар футболчини ўз сафига қўшиб олди. Франи Икич (Хорватия), Лука Кукич (Босния ва Герцеговина), Муҳаммаджон Раҳимов (Тожикистон), Диёр Ортиқбоев, Асилбек Қаюмов ва Маҳмуд Жўрабоев эндиликда фаолиятини бухороликлар клубида давом эттиради.
“Бавария” Ким Мин Же трансферини эълон қилди. “Наполи”нинг жанубий кореялик ўйинчиси учун немис клуби 50 миллион евро сарфлади. 2028 йилнинг ёзига қадар мўлжалланган битим имзолаган Ким янги жамоасида 3-рақам остида ҳаракат қилади.
Мюнхенликлар устози Томас Тухель ўз жамоасида “Реал” ярим ҳимоячиси Орельен Тчуаменини кўрмоқчи. Франциялик футболчи Мадрид клубида етарли ўйин амалиёти кафолатланмайдиган бўлса, Германияга йўл олишга тайёр.
Тчуамени хизматларига “Ливерпуль”дан ҳам қизиқиш бор. “Қизиллар” Жордан Ҳендерсон ва Фабиньонинг ўрнига ўйинчи қидирмоқда. Аммо AS нашри хабарига кўра, 23 ёшли футболчи Мадридни тарк этиш ниятида эмас.
Саудия Арабистони клублари “Ливерпуль”нинг яна бир футболчисини қўлга киритмоқчи. “Ал-Ҳилол” мерсисайдликлар вингери Луис Диас учун 50 миллион евролик таклиф тайёрламоқда, дея хабар берди Record. Бироқ “Ливерпуль” футболчиси билан хайрлашмоқчи эмас.
“Ал-Ҳилол” бу орада Малком трансфери борасида “Зенит” билан келишувга эришди. Ariyadhiah хабарига кўра, бу ҳафта бразилиялик футболчи тиббий кўрикдан ўтади. Аввалроқ питерликлар футболчи учун 50 миллион евро сўрагани хабар қилинганди.
“Ал-Аҳли” “Ньюкасл” ҳужумчиси Аллан Сен-Максимен учун “ҳаккалар”га 25 миллион евролик таклиф билан чиқди. Араблар футболчининг ўзига йилига 12 миллион евро маош тўлашга тайёр.
“Барселона” Ҳарри Кейнни 2024 йилнинг ёзида текинга қўлга киритмоқчи. Англиялик футболчининг “Тоттенҳэм” билан шартномаси 2023/24 йилги мавсум охирида тугайди. Бу ёзда Кейн учун “Бавария” жиддий кураш олиб бормоқда, бироқ “шпорлар” Мюнхен клубининг бир нечта таклифига рад жавобини берди.
“Атлетико” ҳужумкор ярим ҳимоячиси Жоау Феликс “Барселона” ўтиш истагида эканини яшириб ўтирмади. 23 ёшли футболчининг келажаги номаълум бўлиб турибди. Португалиялик иқтидор эгаси ўтган мавсумнинг ярмини “Челси”да ижарада ўтказганди.
“Интер Майами” Хорди Альба трансферини тез орада эълон қилади, дея хабар қилмоқда Mundo Deportivo. Девид Бекҳэмга тегишли клуб аввалроқ Лионель Месси ва Серхио Бускетсни ўз сафига қўшиб олганди.
Майамиликлар, шунингдек, яна бир “Барселона” собиқ вакили Луис Суаресга ҳам қизиқиш билдиряпти. Бироқ уругвайлик футболчи “Гремио” билан шартномани бекор қилиши учун 70 миллион евро миқдоридаги товон пулини тўлашга тўғри келади.
Изоҳ (0)