Дмитрий Песков Украина разведка бошқармаси раҳбари Кирилл Будановнинг “Вагнер” июнь ойи охирида ядро қуролига эгалик қилишга урингани ҳақидаги баёнотларини ёлғон деб атади.
Бир кун олдин Буданов Reuters билан суҳбатда “Вагнер” аскарлари гўёки Воронеж-45 омборидан ядровий қурилмаларни олмоқчи бўлганини айтганди.
23 июнь куни “Вагнер” раҳбари Евгений Пригожин қуролли исён кўтариб, Москва сари йўлга чиқди. Эртаси куни Россия президенти Владимир Путин мурожаат йўллаб, аскарларни бу йўлдан қайтишга чақирди. Акс ҳолда оқибати ёмон бўлишидан огоҳлантирди.
24 июнь куни Беларусь раҳбари Александр Лукашенко Путин билан келишилган ҳолда кун давомида “Вагнер” раҳбарияти билан музокаралар олиб борди. Томонлар Россия Федерацияси ҳудудида “қонли қирғин” содир этилишига йўл қўйилмаслиги тўғрисида келишиб олдилар.
Шундан сўнг, “Вагнер” аскарлари учун хавфсизлик кафолатлари билан боғлиқ вазиятни ҳал қилиш учун мақбул вариант қабул қилинди. Евгений Пригожинга Беларусь ҳудудига кетиш ҳуқуқи берилди.
Аммо орадан 5 кун ўтиб Пригожин бошчилигидаги “Вагнер” аскарлари Кремлда Путин билан учрашгани маълум бўлди.
Изоҳ (0)