“Ўзбекистон темир йўллари” раиси Ҳусниддин Ҳосилов лавозимидан озод этилди

“Ўзбекистон темир йўллари” АЖ раиси Ҳусниддин Ҳосилов лавозимидан озод этилди. Бу ҳақда бугун, 11 июль куни бўлиб ўтган президент раислигидаги видеоселектор йиғилишида маълум қилинди.

Йиғилишда бундан тўрт йил аввал Тошкент-Самарқанд, Тошкент-Андижон пулли йўллари ва “Тахтақорача” довонида пулли тоннел қуриш топшириқлари берилгани, бироқ на лойиҳа қилиш, на инвестор жалб қилиш бўйича ҳалигача амалий ишлар бошланмагани танқид остига олинган.

“Бугунги кунда темирйўлда 2,5 мингта юк вагони етишмаслиги, мавжуд вагонларнинг 3,5 мингтаси таъмир талаблигига қарамай, уларни кўпайтириш, йўлларни модернизация қилиш учун бор-йўғи 16 миллион доллар тўғридан тўғри инвестиция ўзлаштирган. Шунингдек, хорижий инвестициялар ўзлаштириш ҳажми ўтган йилга нисбатан “Ўзавтосаноат”да 47 фоизга, тўқимачиликда 43 фоизга, қурилиш материалларида 31 фоизга камайган”, — дейилади президент матбуот котиби Шерзод Асадов каналида эълон қилинган хабарда.

Хабарга кўра, инвестицияларни жалб қилиш ва уларни ўзлаштиришда сусткашликка йўл қўйгани учун Ҳусниддин Ҳосилов лавозимидан озод этилган.

Маълумот учун, Ҳусниддин Ҳосилов 1970 йил Тошкент вилоятида туғилган. Маълумоти – олий.

У 1992 йилда Тошкент темирйўл муҳандислари институтининг инженер-механик мутахассислиги бўйича тамомлаган. Меҳнат фаолиятини 1992 йилда “Ўзинтерсервис” қўшма корҳонасида тармоқ бошлиғи сифатида бошлаган.

1999–2002 йиллар “Ўзтемирйўлмаштаъмир” унитар корхонасида турли лавозимларда ишлаган. 2002 – 2008 йиллар стратегик ривожланиш бошқармаси бошлиғи, бир вақтнинг ўзида “Ўзбекистон темир йўллари” ДАТК бош менеджер–бош муҳандисининг ўринбосари лавозимида ишлаб келган.

2011 – 2014 йилларда “Ўзбекистон темир йўллари” ДАТК бош менеджер – бош муҳандиси лавозимида ишлаган. 2014–2016 йилларда Вазирлар Маҳкамасининг Департамент мудири лавозимида ишлаб келган.

2016–2019 йилларда “Ўзбекистон темир йўллари” АЖнинг бош менеджер–бош муҳандиси лавозимида ишлаган. Ҳосиловга 2019 йил 5 февралдан ҳукумат қарори билан “Ўзбекистон темир йўллари” АЖ бошқарувининг раиси вазифасини бажариш юклатилган. 2019 йил июнидан расман АЖ бошқарув раиси лавозимини эгаллайди.

Ҳусниддин Ҳосилов 2020 йил 31 январдан эса яна бошқарув раиси “в.б” этиб тайинланганди.