Швециянинг НАТОга кириш жараёни Қуръонни ёқиш акциялари туфайли вақтинча тўхтатилди

Швеция ташқи ишлар вазири Тобиас Биллстрём Қуръоннинг ёқилиши билан боғлиқ ҳаракатлар фонида мамлакатнинг НАТОга аъзо бўлиш жараёни тўхтатилганини айтди. У июль ойида Вильнюсда бўлиб ўтадиган НАТО мамлакатлари Ташқи ишлар вазирликлари саммитида алянсга қўшилиш борасида Туркия билан келишиб олишга умид билдирди.

“Ўтган бир неча ҳафтадаги воқеалар НАТОга аъзо бўлиш жараёнини вақтинча тўхтатди... Албатта, биз Вильнюсдаги саммитни интиқлик билан кутмоқдамиз”, — деди Тобиас Биллстрём Expressen газетасига. НАТОнинг навбатдаги саммити 2023 йил 11—12 июль кунлари Вильнюсда бўлиб ўтади.

21 январь куни даниялик ўта ўнгчи сиёсатчи Расмус Палудан (у Швеция фуқаролигига ҳам эга) Туркиянинг Стокгольмдаги элчихонаси олдида Қуръонни ёқиб юборди. Орадан бир ҳафта ўтиб, Копенгагендаги Туркия элчихонаси олдида ҳам Қуръон ёқилди. Aftonbladet нашрига берган интервьюсида фаол Швеция НАТОга қабул қилинмагунча ҳар жума куни Туркия элчихонаси олдида Қуръонни ёқишга ваъда берган.

Туркия ҳукумати Қуръоннинг ёқилишни нафрат асосида қилинган жиноят, деб билмоқда. Швеция расмийлари бундай ҳаракатларга тўсқинлик қилмаётгани сабабли Туркия президенти Ражаб Тоййиб Эрдўғон Швециянинг НАТОга кириш ҳақидаги аризасини қўллаб-қувватлашдан бош тортди.