Ўзбекистоннинг Малайзиядаги элчиси Равшан Усманов дунёнинг иккинчи энг йирик Қуръони карим босмахонаси — “Nasyrul Quran” маърифий мажмуасига борди, деб хабар беради “Дунё” агентлиги.
“Nasyrul Quran” маърифий мажмуаси 2017 йилда таъсис этилган бўлиб, Қуръони каримни нашр этиш бўйича Мадинадаги Қирол Фаҳд номидаги мажмуадан кейинги дунёдаги иккинчи энг йирик босмахона ҳисобланади. Мажмуада Қуръон хаттотлиги галереяси, босмахона фаолиятини кузатиш нуқтаси ва анжуман хоналари фаолият кўрсатади. Муассаса нашриёт ишидан ташқари, ислом хаттотлик санъати ва меъморчилигини ўрганиш ҳамда тарғиб қилиш, Қуръон қўлёзмаларининг янги дизайнини ишлаб чиқиш билан шуғулланади.
Қайд этилишича, элчининг ташрифи давомида мажмуа директори Абдуллатиф Мираса билан учрашув ўтказилган. Абдуллатиф Мираса хаттотлик Ўзбекистонда фан даражасига кўтарилган бебаҳо санъатлигини инобатга олган ҳолда, ушбу йўналишда тажриба алмашишни йўлга қўйишга қизиқиш билдирган.
Учрашув давомида Самарқанддаги Ҳадис илми мактаби томонидан тақдим этилган Қуръони каримнинг ўзбек тилидаги таржимаси ва 6 жилдлик “Тафсири ирфон” (Қуръони карим маъноларининг ўзбекча таржимаси ва тафсири) Малайзия томонига беғараз тақдим қилинган.
“Мулоқот якунида Малайзия томони ва Самарқанддаги Ҳадис илми мактаби ҳамкорлигида Қуръоннинг ўзбек тилидаги таржимасини Малайзияда нашр қилиш бўйича келишувга эришилди”, — дейилади хабарда.
Шунингдек, хаттотлик санъати бўйича илғор тажриба алмашиш мақсадида Малайзия вакилларининг Ўзбекистонга ташрифини ташкил қилиш, ташкилот раҳбари бошчилигидаги делегациянинг навбатдаги “Халқаро Зиёрат туризми ҳафталиги”да иштирок этиш режалари белгиланган.
Бундан ташқари, ҳамкорликда ислом хаттотлиги бўйича кўргазма ташкил этиш, қўшма семинар ва тренинглар, Ўзбекистоннинг зиёрат туризмини тарғиб қилиш бўйича бошқа маърифий дастурларни амалга ошириш тўғрисида келишиб олинган.
Эслатиб ўтамиз, 2018 йилда Дин ишлари бўйича қўмита “Қуръони карим ва ўзбек тилидаги маънолар таржимаси” номли китобини лотин алифбосида чоп этиш юзасидан тегишли тавсия берганди. 2019 йил март ойида эса “Ўзбекистон” нашриёт матбаа-ижодий уйи томонидан “Қуръони Карим маъноларининг қорақалпоқ тилидаги таржимаси ва тафсири” номли китоб 8 минг нусхада нашр этилган.
Изоҳ (0)