Россияда “Вагнер” раҳбари Евгений Пригожин ҳарбий исён кўтарганидан кейин унинг Санкт-Петербург яқинида жойлашган Шимолий Версал қишлоғидаги дала уйида тинтув ўтказилиб, катта миқдордаги пуллар ва бошқа буюмлар мусодара қилинган эди. 6 июль куни қатор оммавий ахборот воситаларида Пригожиннинг уйидан тинтув вақтида олинган тасвирлар пайдо бўлди.
“Фонтанка” нашри томонидан эълон қилинган суратларда Пригожиннинг уйидан топилган бир қанча буюмлар, жумладан, кўплаб орден ва медаллар тақиб қўйилган кийим, муҳим учрашувлар пайтида эшикка тираб қўйиладиган улкан босқон (кувалда) кабиларни кўриш мумкин.
Яна бир эътиборни тортувчи буюм деворга осиб қўйилган боши узилган террорчи жасадининг тасвири бўлди. Тахминларга кўра, мазкур сурат Сурияда олинган.
Суратлар орасида Пригожинга исёндан роппа-роса бир йил аввал – 2022 йилнинг 20 июнида топширилган Россия Федерацияси қаҳрамони унвони сертификати ҳам бор.
Бундан ташқари, Пригожиннинг уйидан COVID пандемияси вақтидан сақланиб қолган, тўлиқ жиҳозланган тиббиёт хонаси ҳам топилган. Бу ердаги қурилмалар реанимация ва интенсив терапия бўлимларида фойдаланилади.
“Фонтанка”дан ташқари “Известия” нашри ҳам бир қанча суратларни эълон қилди. Улар орасида Пригожиннинг уйидан топилган кўплаб қурол-яроғлар, париклар, сохта ҳужжатлар, бир нечта олтин қуймалари ва катта миқдордаги пуллар бор.
“Вагнер” раҳбарининг уйида фитнес зали ва ибодат хонаси ҳам бор.
Аввалроқ Пригожинга дала уйида тинтув ўтказиш чоғида олиб қўйилган “Glok” пистолети ва қутилардан топилган 10 миллиард рубль ҳам қайтарилганди. Пистолетни “Вагнер” етакчисига Россия мудофаа вазири Сергей Шойгу ҳадя қилган эди.
Изоҳ (0)